ORANJESTAD (AAN) -- Prome Minister Evelyn Wever-Croes a hiba palabra den rueda di prensa semanal di Dialuna,
den cual el a manda su bon deseonan na cada un partido cu lo participa den e contienda electoral, y alavez a haci un yamada pa evita na e maximo posible, expresionnan ofensivo.
Esaki tabata e dignatario su prome tema di agenda: “Eleccion”. Premier Wever-Croes a expresa cu awor si por mira cu tin, oficialmente, 12 partido politico cu ta bay participa den eleccion 2021.
“Pa dia 25 di Juni, nos tin e opcion e ora ey entre e 12 partidonan aki. For di akinan mi kier a desea nan tur exito, y mi ta spera cu e debatenan wordo hiba cu contenido, y na un nivel cu no tin cu recuri na ofensa, pero specialmente, loke mi kier pidi un biaha mas y expresa mi lamento, ta e atake y ofensanan na empleadonan publico, cu ta haci nan trabao specialmente na Censo.
Mi ta kere cu ta momento pa nos compronde cu empleadonan publico ta haci nan trabao, nan ta carga nan responsabilidad, nan ta hacie na un forma integro y no mester di tur e ofensanan aki. Dus, ban evita esey mas tanto posible y ban splica Aruba kico tur nos ta para pe; kico ta e solucionnan cu nos ta ofrece Aruba pa trece progreso y bienestar pa tur ciudadano, pa trece integridad den gobernacion, y pa un miho calidad di bida pa nos famianan na Aruba. Pues, hopi exito for di aworaki, faltando menos cu seis siman pa nos tin eleccion”, Minister Presidente a señala.
