ORANJESTAD (AAN): Na 2018, Naturalis Biodiversity Center a realisa e prome encuesta di sangura pa e Islanan Hulandes di Bou di Biento (Sint Maarten, Sint Eustatius y Saba) den casi 70 aña.
Na november nan tin planea di ripiti e encuesta aki, e biaha aki pa e islanan di Aruba, Bonaire y Curaçao.
E ekipo lo consisti di cinco investigado y dos studiante di diferente instituto y universidad, y lo worde ehecuta den colaboracion estrecho cu unidad local di control di vector di cada isla.
Ademas di ta un molester domestico, e sanguranan por plama un serie di patogeno cerca hende y bestia cu ta responsabel pa causa malesa manera dengue, chikungunya, malaria, Zika, keintura di Rift Valley and West Nile. Den e ultimo decada, Caribe a mira un serie di brote di malesa transmiti pa sangura, incluyendo e brote di chikungunya di 2014, e brote di Zika di 2016 y varios brote di dengue, e ultimo documenta na aña 2020.
Encuesta di sangura: Un estudio nobo, dirigi pa Naturalis Biodiversity Center di Leiden, Hulanda, lo evalua e biodiversidad actual di sangura na e islanan di Aruba, Bonaire y Curaçao. E meta lo ta pa bishita cada isla durante 7 pa 10 dia, poniendo 10 pa 16 trampa pa inventarisa sangura adulto.
Ademas nan lo tuma muestra di larva di lama di varios posibel criadero di sangura. E encuestanan aki lo tuma luga entre dia 13 di november y dia 6 di december, cuminsando na Aruba. E meta di e expedicion ta pa adkiri conocemento tocante e diversidad di sangura y establece herment di identificacion pa yuda e investigacion di salud publico na e islanan.
Implicacion pa salud humano: Hopi biaha, durante un brote, e unico manera pa frena un malesa di plama ta door di controla e poblacion specifico di sangura cu ta responsabel pa e plamamento. Por lo tanto, un maneho eficaz ta rekeri informacion actualisa tanto tocante e poblacion di sangura como tocante su distribucion na e islanan.
A medida cu e condicionnan, debi na cambio climatico cu continua di cambia condicion ambiental, hunto cu un aumento den e poblacion humano di e islanan, nos por spera di mira cambio den otro poblacionnan ecologico (manera sangura) den futuro.
E expedicion aki ta parti di e Mobocon Program, cu ta enfoca riba desaroyo di capacidad pa control di malesa transmiti pa sangura na Bonaire, Sint Eustatius y Saba. E programa aki a cuminsa caba na aña 2017 y ta financia pa Ministerio Hulandes di Salud, Bienestar y Deporte.
{gallery}Prome encuesta di sangura ABC{/gallery}
