Awe Dialuna por pasa busca buki na Colegio Arubano
ORANJESTAD (AAN): A bira conoci, cu durante vakantie pa diferente motibo, tin studiante of mayornan cu no a bay pasa busca e bukinan di Boekenfonds di Colegio Arubano den Vondellaan na Playa.
Boekenfonds a indica cu awe Dialuna 18 di Augustus 2025, tin chens ultimo biaha pa pasa piki e paketenan di buki.
Pesey nan ta pidi e alumnonan pa tuma bon nota, y pasa busca e bukinan aki for di 9:00 am te cu 2:00 pm.
Ademas di esey, DIARIO a compronde cu siman pasa tur mayor- y alumno a ricibi un carta pa notificacion cu e prome dia di scol pa Colegio Arubano HAVO y VWO a cambia. E ta bay bira awor Dialuna 25 di Augustus 2025.
Segun Rectorado, e cambio di fecha ta necesario debi na trabaonan di renobacion cu ta wordo haci den e hal, den administracion di school, y tambe oficinanan. E trabaonan aki a resulta di tin un embergadura mucho mas grandi cu loke anteriormente a kere. Door di haci cambio den fecha di comienzo di scol, nan tin chens pa asina ta sigur cu scol por habri na un forma safe pa tur hende.
Pues riba Dialuna 25 di Augustus, tur alumno ta wordo spera na scol pa asina nan cera conoci cu nan mentor y e klas di mentor. Riba e dia ey, tur asunto practico lo wordo discuti cu ta importante pa haci e aña escolar nobo aki uno exitoso. E rooster di lokaal lo wordo poni na diferente lugar riba tereno di scol pa tur hende por mira.
Studiantenan di CB1 y CB2 ta wordo spera pa 8:15 am na scol. Corda cu na e banda di Shakespearestraat cerca di Mon Plaisir College tambe tin trabao andando, y pesey e caya ta cera pa trafico. Ciclo Basico tin un porta tambe via di e banda pabao di Compleho Deportivo Guillermo Prospero Trinidad.
Alumnonan nobo cu ta bin di MAVO pa bay Havo-4, y pa Vwo-5 cu ta bin di otro scol, ta wordo spera pa 7:30 am na scol.
Tur otro alumno por yega pa 9:00 am.
E prome dia cu ta duna les lo bira Diamars 26 di Augustus 2025.
