Director di ATIA, Herrick Henriquez:
ORANJESTAD (AAN) – Hopi di e turistanan cu ta bin Aruba ta uza e servicio di Arubus, y nan ta expect cu nan tin e sistema di pago digital cu nan por paga cu carchi, sea debit of credit card. Pero esey no ta e caso, y tin biaha, ora nan ta puntra, hasta na careda pa no perde e bus, e turistanan tin cu bay e locket para den rij, pa cumpra carchi of pa cambia dollar pa florin pa nan paga e bus pa bay e area di beach.
Den entrevista cu Matutino DIARIO, director di ATIA Herrick Henriquez, a base di un pregunta, a referi na e tema aki. El a uza como ehemplo, con awendia na practicamente tur otro pais, turistanan ta uza e servicio di Uber, pues rond mundo. Y nan ta haci e pago di e servicio den forma digital. Por ehemplo, na Colombia, unda cu e turista kier bay ta uza su carchi, subi un Uber, bay cu ne.
“Mi no ta bisa cu mester bin Uber na Aruba, pero un manera si, cu tur servicio di transporte publico por bay via un plataforma asina. Nos ta pensa cu tur e taxistanan, nan ta haci un bon trabao, nan ta e cara di e prome hende cu mayoria di biaha e turistanan ta wak na Aruba, pero mester keda un isla moderno tambe. Bo no por propaganda bo mes como un di e ‘top destinations’ pero mester traha cu cen cash. Henter mundo ta birando digital, y eynan mester pensa cu tambe tin oportunidadnan pa e sector aki, pasobra awo mes si bo ta busca un taxi, bo mester bay unda cu nan ta para, bo no por scoge pa habri un app y bisa ‘ami ta para akinan, mi mester di un taxi’. Pues, esey ta un di e beneficionan cu bo tin cu un app asina, cu ta haci mas facil pa por haya transporte na Aruba”, director di ATA, Herrick Henriquez a remarca.
