Durante e prome reunion riba nivel gubernamental riba repago di debe di Covid
ORANJESTAD (AAN): Na su yegada back na Aruba diahuebs atardi, Prome Minsiter Evelyn Wever-Croes den conferencia di prensa di Gobierno di Aruba, a duna un resumen di su biahe y reunionnan na Hulanda. Prome Minister a indica cu un reunion hopi importante na Hulanda hunto cu Minister di Finanzas, Xiomara Maduro, ta e prome reunion riba nivel gubernamental pa loke ta trata e repago di e debe di Covid cu Aruba tin cu Hulanda.
Manera conoci, despues cu Covid a haci su entrada na Aruba, no por a yega na finanzas niun caminda. E mercado internacional, na unda cu Aruba semper ta bay pa prestamo, a cera porta pa Aruba.
Na e momento ey, Hulanda tabata e unico dispuesto pa presta Aruba placa y total a presta Aruba 916 miyon Florin. E placa aki a bay pa Gobierno sigui opera y pa adresa tur gasto di pandemia y e gastonan adicional cu a bin riba tereno di salud. Tambe a paga FASE na esnan cu a perde trabao. A yuda sector priva cu diferente Proyecto pa asina nan tambe por keda cabes riba awa.
Hulanda ta dispuesto pa refinancia debe: Prome Minister a indica cu e reunion a duna claridad riba e posicion di Hulanda pa loke ta trata nos debe.
Hulanda ta dispuesto pa refinancia e debe cu lo vence na october di e aña aki.
Na principio e fecha di vencemento tabata na april 2022 y despues Hulanda e rek e ta na october 2023.
Hulanda no ta dispuesto pa papia riba dispensacion: Tambe Hulanda a indica cu nan no ta dispuesto pa papia riba dispensacion (‘kwijtschelding’, ‘schenking’).
Cu esaki tambe, ta trece claridad pa Aruba pasobra hopi hende te pensa cu esaki ta posibel. Pero Hulanda a indica cu esaki no ta e caso.
Hulanda lo no presta Aruba na 0 porciento: Prome Minister a duna di conoce tambe cu Hulanda lo no presta Aruba na 0 porciento. Pasobra Hulanda mes ta presta pagando interes (2 pa 3 porciento) y por lo tanto nan lo cobra Aruba interes mas halto cu esey. Ainda no sa na ki porcentahe Aruba lo haya e prestamo. Esey lo worde fiha pronto.
“Nos a palabra cu nos lo traha un memorandum financiero economico den cua lo pone tur loke cu Aruba tin mester na inversion den nos pais pa nos por ta mas fuerte y resiliente y asina hunto nos lo determina e modalidadnan di e fianza. Importante ta cu esaki ta e prome biaha cu tin claridad cu Hulanda ta dispuesto pa refinancia nos debe”, Prome Minister a expresa.
Prome Minister a duna di conoce cu Minister di Finanzas ta na Washington e siman aki pa asina delibera cu e Mercado Internacional riba e posibilidad pa haya un miho deal di pago cu Hulanda ta duna nos. Esaki, Prome Minsiter a remarca, ta hopi importante pasobra e lo soluciona e problemanan di repago di e debe.
