Randy Maduro, PR Santa Rosa:
ORANJESTAD (AAN) – Randy Maduro, Relacionista Publico di Departamento di Agricultura, Cria y Pesca (LVV-Santa Rosa), a hiba palabra den e conferencia di prensa tocante inicio di Censo Economico 2023, como cu Santa Rosa tambe ta parti di e encuestadornan, specificamente riba tema di sector primario.
Maduro a cuminza bisando cu hopi hende ta puntra pakico LVV den Censo Economico, pero ta asina cu sector primario ta uno hopi importante y masha popular, ultimamente.
El a expresa cu tempo cu e pandemia a dal Aruba, hopi ta esnan cu a bishita Santa Rosa, y door di esey LVV ta hopi agradecido cu e samenwerking hunto cu CBS, pa asina nan por acerca tambe esnan cu ta haci practica di agricultura, na e sector primario di Aruba.
El a indica cu nan ta tres persona na Departamento di Agricultura, Cria y Pesca, esta Santa Rosa, cu ta bay percura pa esaki, cu ta bay traha specificamente riba e sector primario, por ehemplo, kizas nan por puntra na momento di bishita e personanan concerni, tocante tereno, grandura, pakico e ta bay wordo uza si ta pa cria, agricultura, y esey ta e detayenan riba cual nan ta bay haci pregunta.
“Nos ta haci un apelacion tambe, pa na momento cu nos yega cerca bo, pa duna cooperacion completamente, na e dos colega y na mi persona tambe, cu ta encarga cu esaki, pa asina nos por tin un bista hopi mas amplio pa loke ta sector primario aki na Aruba”, Randy Maduro, PR di LVV a señala.
