Parlamentario Evelyn Wever Croes:
- E Ley di LAft y e supervision door di CAft
ORANJESTAD (AAN) Siguiendo cu e conferencia di prensa di fraccion di MEP, cu Parlamentario Evelyn Wever-Croes na palabra, aki e ta referi na algun alternativa cu Professor mr. Douwe Jan Elzinga a aporta na MEP, encuanto e Ley di HOFA.
“Su alternativa y recomendacionnan cu e ta duna Aruba ta cu Aruba tin un instrumento aworaki caba, cu ta haci e supervision financiero posible, cu ta e Ley di LAft y supervision door di CAft.
E ta bisa cu, segun Constitucion, esakinan ta funciona bon, y ta traha bon. Kiermen, no cambia esey, keda na locual cu ta traha bon. El a bisa cu asina Aruba ta mantene su responsabilidad y su autonomia. Y el a bisa cu si asina mes cu mester yega na un ley nobo cu Hulanda, no e HOFA pasobra esey e ta bisa no ta bon pa Aruba, pero si mester bin cu algo nobo percura pa bo tin un periodo defini den dje, por ehemplo keda aplicabel pa cinco cu siete aña maximo, no mas largo cu esey, pa crea un miho balansa entre Aruba cu Hulanda, y en todo caso, no inclui ningun stipulacion cu ta bisa cu Gobierno di Hulanda mester aproba un cambio di ley prome cu bo por cambia e ley aki na Aruba”, Parlamentario Wever-Croes a señala.
“Pues loke e Professor aki ta bisa nos ta: 1. Nos tin un sistema cu ta traha caba y el a funciona, pasobra finanzanan ta bayendo bon na Aruba; nos tin supervision financiero cu ta funciona, no cambia esey. 2. E ta bisa cu e ley di HOFA no ta bon, e ta contra nos Constitucion, y 3. E ta bisa cu no ta necesario, pasobra ya bo tin algo otro caba.” Parlamentario Evelyn Wever-Croes a subraya.
El a remarca cu e consehonan aki e ta considera nan hopi valioso y kier comparti cu Comunidad cu Fraccion di MEP ta sigui haci su trabao buscando tur argumento pa purba convence Gobierno, cu e paso cu nan a dal pa bay di acuerdo cu e Ley aki, no ta un paso corecto.
“Nos a comparti e pensamento di Professor mr. Douwe Jan Elzinga cu gremionan comercial y sindical caba, siman pasa, y den e dianan nos dilanti nos lo sigui comparti esaki cu henter comunidad, tambe”, Parlamentario Evelyn Wever-Croes a subraya.
