Proceso na Aeropuerto lo wordo agiliza pa prepara pa e temporada halto cu mas fluho di bishitante

ORANJESTAD (AAN) — CEO di ATA, Ronella Croes a señala den conferencia di prensa, cu e impacto di mas grandi pa Aruba su turismo, ta sigur e nivel di riesgo halto, cu Aruba tin den e mercado primario; kiermen, e mercado Mericano.

            “Aki, hunto cu DVG y tambe cu Minister Plenipotenciario na Washington, ta loby pa asina baha Aruba for di e nivel di riesgo unda cu e ta awor. E cantidad di casonan, den e desaroyo recien ta pone cu nos por move den un nivel di riesgo menos halto”, Croes a señala. El a agrega cu e trabaonan ta andando pa por pusha esaki tambe.

            E cantidad di bishitantenan lo mustra, y ta expect esaki tambe, un subida a base mensual pa resto di aña.     Na October ta spera 70.000 bishitante, cu ta 10.000 mas cu September; pa November esaki por ta 80.000 y na December lo por bula y yega 100.000. Asina Ronella Croes a indica.

El a sigui bisa cu un “high light” pa cu e Luna di November, ta cu Aruba lo ta inaugurando un vuelo nobo di Frontier Airlines for di Miami, riba dia 20 di November.

            Segun Ronella Croes, si mira aña 2022, ATA ta indica cu nan ta premirando un recuperacion di 95% di e cantidad di bishitantenan cu ta bin cu avion, compara cu aña 2019.  Esaki kiermen cu Aruba lo surpass un miyon bishitante pa e otro aña. Si añadi e proyeccion pa cu turismo crusero, e cantidad di bishitantenan cu ta bin cu barco Aruba lo por ta yegando 1.5 miyon di bishitante total, pa 2022.

“E proyeccion di recupera 95% di e cantidad di bishitantenan cu nos ta califica como ‘stay over’ te hasta e porcentahe aki por ta mas halto. Es decir, cu

            Lo por ta yegando 100% di recuperacion, of surpasa  esaki pa aña 2022 compara cu 2019.  “Tambe ta bon pa subraya cu diferente trabao ta tumando lugar, pa agiliza tambe e proceso na Aeropuerto y prepara pa un temporada halto, cu ta den porta. Aki mester indica cu pa turistanan, entre otro, a haci un cambio pa loke ta trata e proceso di imigracion. Antes e turista tabata tin diferente escogencia y por a scoge pa yega Aruba, mustra su resultado di test negativo y esaki tabata wordo controla, consecuentemente,  pa DVG na Aeropuerto. Esaki lo no ta posible mas pa e turista cu ta bishita Aruba. Aworaki, e turista mester upload su resultado negativo di covid-19, prome cu e yega Aruba y esaki ta wordo controla door di un ekipo di DVG, of e ta opta pa haci su test, akinan. Tur esakinan ta cambionan masha chikito pero hopi grandi cu ta yuda agiliza e proceso di maneho di e bishitantenan na Aeropuerto. Asina Aruba ta prepara pa un temporada halto y mas fluho di bishitante”, CEO di ATA, Ronella Croes a relata.