Na inicio di Februari expectativa turismo di Merca tabata prometedor --- *Informe inicial di DIARIO riba crisis Ukraine y turismo confirma --- *Crisis Ukraine a aumenta prijs di biahe y estadia rond mundo
ORANJESTAD(AAN)—E demanda mundial pa petroleo y gas a subi na paisnan cu a cera porta pa negoshi petroleo cu Rusia, como parti di medidanan den cuadro di e conflicto na Ukraine.
Prijs di petroleo for di 2021 tabata spera cualkier desaroyo pa e sigui subi despues cu e decisionnan den cuadro di cambio di clima, a mustra cu negoshi den azeta y gas lo wordo afecta pa e acuerdo di clima cu a wordo firma.
Mundialmente a cuminsa tuma medida pa baha uzo di petroleo y gas y for di e tempo DIARIO a cuminsa spierta pa e resultado cu e decision aki tabata tin riba prijs di petroleo di paisnan reuni den OPEC, cu a mira final di su negoshi lucrativo yega cerca.
E condicionnan di guera y sigur e menasa di un guera mundial a afecta e prijs di petroleo pio cu mundo por a pensa na final di 2021, ora ya prijs di gasolin y gas a cuminsa subi mundialmente.
Na momento cu e crisis na Ukraine a bira un confrontacion serio, cu realmente ta un guera mundial, e prome advertencia importante di DIARIO tabata e resultado cu e por tin pa turismo na Aruba.
DIARIO mester a lansa e advertencia pa Aruba, cu mescos cu hopi pais di e parti Occidental di mundo, a cuminsa prepara su mes pa e periodo despues di impacto pisa di Covid-19 riba economia y sigur sector di turismo.
E guera na Ukraine a afecta e stabilidad mundial pa loke ta trata condicionnan manera trankilidad politico y paz na e momento cu Aruba tambe mester a recupera riba tereno economico, financiero y social di e Coronavirus nobo.
Ayera DIARIO tabata den contacto cu instancianan local y internacional y por a haya confirmacion di e menasa grandi cu empresanan internacional y local di turismo ta mira den e desaroyonan actual den cual sigur e prijs di petroleo ta hunga un papel importante.
Interesnan turistico na tur continente ta sumamente preocupa cu e impacto cu e prijs di petroleo tin directamente riba jet fuel loke ta influencia e costo di biahe na un forma serio.
E companianan di aviacion mundialmente ta sinti e peso cu e aumento di prijs di petroleo ta nifica pa nan costo cu lo mester wordo compensa den prijs di e servicio cu nan ta presta den mundo di aviacion si nan kier sobrevivi, sigur despues di e atake financiero di Covid-19 riba mundo di aviacion.
E aumento di prijs di petroleo ta nifica aumento di tur prijs den sector servicio, pa cuminsa cu costo di transporte local pa costo di prijs di Food & Beverage.
Informantenan clave den sector internacional di turismo a mustra DIARIO cu e crisis mundial tabata e segundo atake inespera riba stabilidad di e sector di biahe, cu no a spera ni e pandemia ni e crisis mundial actual.
“Nos ta papia di un double shot,” tabata e informacion cu DIARIO a ricibi na momento cu mundo internacional di turismo cu a sufri directamente perdidanan grandi pa motibo di e Coronavirus nobo, ta mira con e aumento di prijs general cu e costo di petroleo ta trece, lo nifica pa biahe y hospedahe.
“Prijs di turismo mundial ta wordo afecta atrobe. Costo basico di turismo a subi,” informantenan a indica.
Di agente biahero pa cadenanan di hotel te industria cu indirectamente ta mara na turismo, preocupacion serio por a wordo sinti ayera na momento cu prijs di petroleo a pasa 125 Dollar pa baril y e tension mundial tabata sigui crece.
DIARIO ta den contacto continuo y directo pa informa Aruba den un situacion mundial di preocupacion mayor.
