Relaciona cu accion contra medida 12.6 %
ORANJESTAD (AAN): Diamars mainta Gobierno a cuminsa un caso sumario caso contra sindicato di Douane, SADA y sindicato di Polis, SPA. Esaki tabata continuacion di casonan sumario cu Gobierno a cuminsa. Promer tabata contra SIMAR y SEPPA y awor contra SADA y SPA. Por a mira presidente di Simar tambe tabata presente pa duna sosten. Abogado mr. Kock a representa SPA y mr. Rosenstand a representa SADA. Tambe por a mira mr. Duijneveld cu a asisti mr. Rosenstand.
Un Hues di Curacao hunto cu su Griffier a bin Aruba pa trata e caso. Esaki ta pa mustra e imparcialidad cu no ta e Hues cu ta atendiendo e caso di SEPPA y SPA lo atende e caso aki tambe. Den e articulo aki, DIARIO ta publica e demanda di Gobierno y e intermediacion di Hues. Den un otro articulo ta publica e punto di bista di e sindicatonan SADA y SPA.
GOBIERNO KIER PARA ACCION
Tabatin 4 hurista di Gobierno y uno a hiba palabra. Tambe tabata presente señor Paris di Direccion di Finanzas. A mustra cu 18 y 19 Februari 2022 Gobierno a cuminsa e casonan sumario promer contra SIMAR y SEPPA. Despues contra SADA y SPA.
E hurista di Gobierno a bisa cu tin motibo di urgencia mirando cu SPA y SADA kier tene accion, cual lo perhudica Aruba. El a mustra cu SPA mester percura pa seguridad y orden publico, mientras cu SADA mester percura cu turistanan, carganan y barconan por drenta Aruba. E accionnan aki lo perhudica Aruba. E accion di SPA y SADA kier tuma ta mesun cos cu SIMAR y SEPPA esta reduci oranan di trabao.
Hurista di Gobierno a splica Hues cu door di Covid, Gobierno mester a haci uso di ayudo financiero di Hulanda y Gobierno mester paga bek. El a mustra cu sindicatonan cu accion kier pa para e 12.6 % di medida. Tabatin negociacionnan andando y diripiente sindicatonan a para esaki sin ningun motibo. Sindicatonan ta haya cu e medida ta inhusto. Segun e hurista, esey no ta berdad. Esaki ta regla pa ley. E accion di sindicatonan ta cu nan ta traha igual cu nan salario 87.4% y ta reduci e 12.6 % den oranan di trabao.
Hulanda kier mira di Gobierno accionnan pa baha gastonan y paga e ayudo financiero. Na ultimo ora SPA a haci un caso sumario pa Gobierno bin cu reduccion di oranan di trabao.
AINDA GOBIERNO NO TIN ALTERNATIVA CONCRETO
Hues a bay intermedia y a haci preguntanan. Hues a puntra kico ta otro alternativanan di Gobierno pa cu medida. Paris a splica cu e medida mester ta pa reduci gastonan di personal di Gobierno. Ainda no tin un alternativa concreto pasobra ainda mester negocia cu Hulanda.
POLIS TA GARANTIZA ORDEN PUBLICO
Hues puntra Solognier di SPA ki accion lo tabatin pensa di tuma. Solognier a bisa cu tabatin negociacionnan cu Gobierno pero no a logra. El a splica cu tin un protocol di 2019 cu alto mando di Polis, pa cu accion cu miembronan di SPA por tuma. E protocol ta mustra cu Polis por traha cu minimo esta 1 hefe cu 4 Polis. Asina por garantiza orden publico y seguridad. Solognier a sigui splica cu tur e otro agentenan di Polis lo ta standby y lo keda na e lugar di reunion. El a bisa cu tabatin un reunion di 12’or pa 2’or, cu tabata un accion. E plan tabata pa 3 dia di accion pero Gobierno a bin cu un medida di orden. Di parti di hurista di Gobierno a mustra cu no a asina. El a bisa cu el a papia cu Solognier y Solognier a bisa cu e accion ta pa tempo indefini.
DOUANE NO A CONVOCA ACCION
Hues a puntra Maduro di SADA, ki accion lo tuma. Maduro a bisa Hues cu a yama un reunion na Januari 2022 cu miembro y no miembro pa duna splicacion. E director di Douane a manda carta pa SADA mustrando cu lo tuma medida disciplinario. Maduro a bisa Hues cu 1 Februari 2022, a reuni cu miembronan y a bisa nan cu no ta tuma accion. El a bisa cu e plan tabata cu 18 Februari 2022 lo a bin cu reduccion di ora di trabao y no ta bin cu accion. A palabra cu lo papia cu director con lo ehecuta esaki pa no perhudica e trabao di Douane pa cu comunidad.
NO TIN REEMPLAZO
Hues a puntra Gobierno si e sindicatonan reduci trabao, si tin suficiente personal pa atende esaki. Gobierno a mustra cu si bin cu e reduccion di ora di trabao, lo mester bin cu overtime pasobra ta trata di personanan specialisa y no trabou di oficina. Hues a puntra si no tin demasiado hende den Gobierno. E hurista a splica cu aki ta trata di departamentonan specialisa. El a splica cu e intension ta pa reduci e personal en general den e parti administrativo. Paris a splica cu Gobierno ta den un situacion financiero hopi dificil y cu Hulanda ta yudando. Hulanda kier mira un plan di Gobierno con ta bay reduci e personal di Gobierno.
Hues a sera tratamento di e caso y a bisa 30 Maart 2022 lo tin sentencia.
