Presupuesto 2022 a keda aproba pa Parlamento di Aruba cu un deficit mas reduci

Ministro Maduro di Finansa satisfecho:

ORANJESTAD (AAN): Diamars anochi despues di 5 dia di debate, Presupuesto 2022 pa Pais Aruba a keda aproba pa Parlamento di Aruba. E presupuesto ta mustra un deficit mas reduci indicando e recuperacion economico di Aruba y tambe un disciplina pa sigui baha gasto di operacion di Gobierno.

   Ta baha e deficit cu 536 miyon Florin: Na 2019 Pais Aruba a logra yega na un surplus chikito di 3,9 miyon Florin den e presupuesto di nos Pais, pero na momento cu e pandemia a presenta, nos Pais a perde entrada y cune a presenta un deficit grandi.

   Durante e pandemia a purba contene gasto di gobernacion, pero asina mes nos Pais a core cu un deficit di 764 miyon den aña 2020. A sigui un disciplina pa por contene gastonan y asina nos por mira cu a logra baha e deficit di 764 miyon Florin den aña 2020, pa un deficit di 534 miyon Florin den aña 2021 y awor den aña 2022 a keda presupuesta un deficit di 228 miyon Florin.

   Pues un reduccion di 536 miyon Florin cu ta un esfuerso grandi cu ta worde haci pa asina por mehora e finansa publico na nos Pais.

   Ta preparando pa un surplus den aña 2023: Pa Aruba por sali mas fuerte di e situacion di pandemia ta necesario pa por yega na un presupuesto cu ta conoce surplus atrobe pa nos Pais.

   Pesey Gobierno ta buscando e balansa entre sigui cu e disciplina pa reduci gasto di gobernacion y percura pa yega na entrada necesario pa por reduci e deficit aun mas y yega na un surplus den aña 2023.

   E ta bay exigi un disciplina grandi pa por sigui reduci e deficit den un periodo chikito asina, pero e ta necesario ya cu mas largo keda crece e debe, menos espacio lo bay tin pa por ehecuta proyectonan na bienestar di Aruba.