Presentacion di bukinan di autora Adelaida Ponson-Arends

ORANJESTAD (AAN): Den un ambiente hopi ameno, autora Adelaida Ponson-Arends a presenta su bukinan na Biblioteca Nacional Aruba.

Señora Ponson-Arends a splica cu un di su bukinan, el a skirbi na 2019, pero e no a publica esaki oficialmente pero el a bende tur su copianan.

Durante e pandemia, el a sinti e impulso pa skirbi pasobra e situacion a traha hopi riba dje, y sigur riba tur hende. Tur dia e tabata skirbi, manera un diario, y na final esaki a bira un buki titula 'Tempo di Miedo'. El a dura dos aña pa e por a cab'e y el a dicidi di publica tanto e buki aki, como su prome buki.

Señora Ponson-Arends a bisa cu e ta hayando hopi bon comentario di e bukinan, specialmente riba e buki 'Recuerdonan Stima' cu ta trata di un storia di tempo e tabata chikito. E ta hopi contento cu esaki a haya un bon acogida di e lectornan.