Awe Prome Minister lo reuni cu Secretario di Estado --- *Tambe lo trata e tema di conseho pa 'aanwijzing'
ORANJESTAD (AAN): Diamars atardi Premier Evelyn Wever - Croes a biaha pa Hulanda pa reuni cu Secretario di Estado Alexandra van Huffelen. Motibo principal di e biahe ta pa trata e tema di pago di 5% bek na empleadonan publico. E reunion lo tuma luga diaranson 20 di juli, y Prome Minister lo trata na convence Hulanda pa e pago tuma luga fin di e luna aki.
Durante di e reunion lo trata diferente tema pero e tema principal lo ta pago di 5% bek na empleadonan publico fin di e luna aki (juli) sin ningun problema. Manera ta conoci, a bin un impase ora cu Hulanda a duna su opinion cu Aruba no a cumpli cu e condicionnan pa por paga empleadonan publico e 5%. Motibo pa esaki ta door di cambionan cu a wordo inclui den e ley, door di Parlamento di Aruba. Gobierno di Aruba no ta di acuerdo cu e posicion aki.
Prome Minister Wever - Croes a expresa: “Nos conoce algo cu yama democracia parlamentario, ‘parlementaire democratie’. Den un democracia parlamentario e Parlamento tin e ultimo palabra. Asina e ta na Aruba y asina e ta tambe na Hulanda. Ningun Gobierno ni na Aruba ni na Hulanda por bisa un Parlamento kico pa haci.”
Parlamento a bin cu dos cambio den e ley cu Hulanda ta insisti cu no ta corecto. Pa cual Prome Minister a bisa cu ta importante pa mira proporcion di e acto y e consecuencia. E ley cu tin aworaki incluyendo e cambionan, ta stipula cu Aruba aworaki tin un Landsverordening Normering Topinkomens (LNT). Un ley cu ta pone un maximo na salario di directornan di companianan estatal. Segun encuesta conduci na Aruba, ta trata di 7 persona cu ta gana riba e norma di 329 mil florin pa aña. E ley aworaki ta stipula cu tur hende cu drenta den servicio na un compania estatal entrante prome di augustus, no por gana mas cu 329 mil florin pa aña, cual ta 130% di e salario di un Prome Minister, y tur e condicionnan secundario di trabou.
Esnan cu ya caba tabatin un salario mas halto cu esey (den e caso aki 7 persona segun estudio haci), tin 5 aña di tempo pa baha e salario te na e nivel stipula. Prome Minister ta splica cu esey ta e esencia di e ley cu tin aki na Aruba y na Hulanda tambe. Pues no ta di acuerdo cu e opinion di Hulanda cu Aruba no a cumpli. “E ta algo historico cu Aruba tin e ley aki awor,” Prome Minister ta acentua.
Algo cu Premier Wever - Croes lo trece dilanti den e reunion cu Hulanda ta pa tene cuenta cu mas o menos 4000 pa 5000 mama y tata di famia ta traha den gobierno, den fundacionnan subsidia pa gobierno, den companianan semi estatal y sector semi publico. Y e grupo aki ta wardando riba e 5% desde cu a entrega na luna di mei 2020 tur luna sagradamente.
Banda di esaki, costo di bida a aumenta drasticamente y tin un crisis social economico y e guera na Ukraine tin un efecto hopi pisa riba Aruba. “Awo ta e momento cu realmente mester yuda nos hendenan,” Premier Wever - Croes a enfatisa.
Concluyendo Prome Minister a bisa cu banda di e tema di 5%, lo trata e tema di conseho pa 'aanwijzing', lo reuni tambe cu CFT y asina sigui haci tur cos posibel pa evita cu Aruba ta haya un 'aanwijzing' den e Conseho di Minister di Reino cu lo tuma luga fin di augustus.
“Nos ta bay cu fe y confiansa cu lo logra e meta principal, cual ta progreso y bienestar pa henter nos pais,” Prome Minister a termina bisando
