ORANJESTAD (AAN): Polis tabatin man yen Dialuna anochi pa atende diferente denuncia haci door di habitantenan den area di Fiyostraat na Tarabana.
Tur esaki causa pa 3 delincuente hopi anti-social, cu ta den e area djis pa busca problema. Pero e biaha aki esaki a escala na un forma, unda na final un dama a keda cu herida grave na su cara.
E trio di delincuentenan aki ta conoci caba den varios caya como hendenan cu nan ta describi como “Schrik van de Buurt”. Hendenan cu ta problema so nan ta gusta busca pa nan bida y ta usa palabra malo cada 5 seconde y insulta hende.
E trio di delincuente ta consisti di rumannan di inicial R., y nan ta cana semper cu mas amigo cu tin mesun comportacion anti-social pa crea caos.
Ora cu nan pasa den Fiyostraat na Tarabana, semper e grupo aki ta haya problema cu e hobennan eyden. Y esey ta loke a pasa Dialuna anochi tambe.
Pa 6:45 pm, un unidad di Polis di Playa a ser manda na Fiyostraat pa asina intermedia den un caso. Agentenan a yega y papia cu un señora. El a bisa nan cu el a caba di haya un scop den su cara, for di un di e rumannan R.
Prome denuncia: E mesun rumannan delincuente R. a bin den Fiyostraat atrobe pa molestia hobennan y bringa cu nan. Pero e biaha aki e rumannan R. hunto cu un amigo mas cu tambe ta di inicial R., tabata pushando un Nissan Sentra color shinishi. Pa por tin prueba di tur e discordia cu e trio aki ta haci ora di pasa den e caya, e señora a dicidi na usa su Smartphone pa asina graba video di loke e trio ta haciendo ora di pusha e auto den e caya. E video ta graba ta cuanto problema, insulto y bulgaridad ta wordo grita ora nan destrui e anochi trankil ey den Fiyostraat, y mira nan ta enfrenta otro hobennan trankil di e caya.
Debi na esaki a cuminza cu un intercambio di palabra pisa entre e trio y e señora, ora nan a mire ta grabando. Diripiente e ruman R. a yega, hisa su pia y a dal un scop fuerte den cara banda drechi di e señora. Esaki a laga un golpi basta serio. E señora a bisa Polis cu e kier entrega keho contra R.
Pero e momento ey cu Polis a yega, e trio no tabatey mas den e caya. Pesey mes Fiyostraat tabata trankil asina.
Di dos denuncia: Pa 7:00 pm, Central di Polis a dicidi na manda e patruya ey na un otro cas den Fiyostraat, pa un otro denuncia. Polis a finaliza di atende e denuncia di e señora, y a bay na e otro adres.
Ora cu Polis a yega, nan a papia cu un hoben, kende a splica agentenan cu un rato prome e presencia di un trio di delincuente den e caya a crea caos. E hoben a bisa cu ora e trio pushando e Nissan Sentra a pasa banda di dje, nan a bin den su direccion y a atake. E ta referi na e rumannan di inicial R., y e otro ta un hoben color scur cu cabey rasta. Nan a dal’e y maltrate tambe. Esaki a socede den e Supermarket cu tin eybanda.
Polis a tuma e denuncia di e hoben aki, y aki Polis a cuminza compronde cu berdad e tres delincuentenan aki a pasa den Fiyostraat ta buscando guera cu tur hende.
Detencion a cay: Despues di a keda cla cu esey, informe a drenta na autoridad, cu hendenan a mira cu un Nissan Sentra shinishi a wordo laga atras den Canteloupestraat, net banda di e muraya di Centro di Bario y Deporte Dakota.
Polis a tende esaki y mesora a cuminza sospecha, cu esaki lo ta e Nissan Sentra cu e trio di delincuente ta pushando den Fiyostraat. Cantaloupestraat ta keda como 280 meter leu di Fiyostraat, y pesey diferente unidad di Polis a mobiliza pa eynan, y kizas por topa e trio eynan.
Ora cu e unidadnan a yega eynan, nan a bin topa cu e rumannan R., y e hoben cabey rasta di inicial R. tambe. Polis a stop nan y atende nan. Autoridad mesora a contact e Fiscal cu ta na warda pa delibera riba e sucedido den Fiyostraat. Fiscal a duna ordo pa mesora detene e rumannan R., como tambe e hoben R. Tambe a duna ordo pa confisca e Nissan Sentra shinishi.
A pone boei na man di e sospechosonan, y Polis a cuminza controla e Nissan Sentra. Pa auoridad, ta igual cu nan a canta ‘bingo’.
Den e sedan nan a haya un schoudertas color blauwscur den cual tin dos Smartphone marca Samsung, 1 lighter color biña, 1 lighter color berde scur, un estuche berde bashi, 1 sker di metal, 1 screwdriver, un sakito di plastico transparente conteniendo marihuana, un sakito di plastico transparente cu cocaina, un tubo di plastico geel conteniendo sakitonan di plastico transparente conteniendo piedra di cocaina, varios bolita di foil conteniendo piedra di cocaina, y tambe a haya algun placa larga.
Polis a transporta e Nissan Sentra cu Takelwagen rumbo pa e Warda di Polis safe na Shaba, unda awor tin Security Video Camera instala tur rond.
E trio di delincuente a wordo presenta dilanti Fiscal Auxiliar na Warda di Playa, kende a duna ordo inmediato pa nan tres wordo encarcela, pa mas investigacion. Ministerio Publico ta atende e caso serio aki. Sigur un bon trabao di Polis, y danki na e denuncia di ciudadanonan cu a fada di haya molester di anti-socialnan.
