Premier Wever-Croes a instala oficialmente e comision cu lo enfoca riba hende muhe

Durante Dia Internacional di Hende Muhe:

ORANJESTAD (AAN):  Prome Minister, Evelyn Wever-Croes a bisa den un entrevista cu DIARIO cu a haci un estudio pa haya sa con e posicion di hende muhe ta na Aruba y kico mester haci pa sigui desaroya y pa wak kico ta e retonan.

            Tur esaki a wordo poni den e 'gender policy' cu a keda publica dos aña pasa. Di e 'gender policy' awor a saca un capitulo cu ta esun mas grandi cu ta esun di abuso contra hende muhe y mucha muhe. A mira cu abuso contra mucha muhe ta cuminsa na un edad hopi jong, e mandatario a remarca.

            Pesey ta enfocando hopi riba esaki. Durante e conferencia riba Dia Internacional di Hende Muhe, diabierna ultimo, a institui un comision oficialmente.

            Ainda parti di e abusonan cu tin ta bin di e hecho cu hende homber toch ainda ta kere cu ta mas cu hende muhe y cu hende muhe ta menos. Cu por abusa di dje fisicamente, a bisa.

            Mester traha mas riba conscientisacion. Tin hopi reto. Covid no a yuda tampoco, pero aworaki ta bay concentra riba haya sa kico tin cu haci pa stop e abusonan aki, Wever-Croes a splica.