Polisnan a tene reconstruccion di e accident fatal cu E-Scooter

A check e asunto di velocidad di e Honda Fit...

• Henter e caminda a wordo cera pa e simulacro na Shiribana 

ORANJESTAD (AAN): Unidadnan di Polis a staciona nan na varios punto Diaranson anochi despues di 9:00 pm, pa asina cera e pida caminda di 1.3 km largo di rotonde Tanki Leendert te na rotonde Paradera, y tur e cayanan cu ta sali eynan, pa asina por haci un reconstruccion di e accident fatal cu a socede Diadomingo marduga dia 27 di October alrededor di 1:00 am net un tiki dilanti di Tao Bao.

   Manera ta conoci, e Diadomingo marduga aya e dama Julieth Patricia Patiño Castro di 35 aña di nacionalidad Colombiano a perde su bida, ora cu e ta coriendo rumbo pa su cas riba un E-Scooter.  Esaki ta un bicicleta tipo step, cu ta funciona cu bateria.

   Net eynan, un auto compacto Honda Fit color ros a pasa y dal e, lage eybao sin señal vita.  E chauffeur di e auto mes a sigui core sin asumi responsabilidad y a keda scondi casi 4 dia prome cu el a entrega su mes.  El chauffeur a wordo identifica como Jesus R. Rosendo-D. di 44 aña di nacionalidad venezolano, kende ta mecanico, pero conoci como un Taxista pirata.

   Polisnan a confirma cu nan tin security video di e area, pero basa riba declaracion di e sospechoso durante interogacion, a opta pa haci un reconstruccion pa mira si acaso su declaracion ta cuadra of no.  Pa esaki, Polisnan a traha un plan pa hunto cu diferente unidad, y tambe Polis motoriza por cera e caminda hermeticamente pa haci test.  Diferente specialista di trafico, hunto cu esnan di Ministerio Publico a para na banda pa monitor e caso.

   Polis a busca un E-Scooter similar cu esun envolvi den e accident, y tambe a busca un Honda Fit pa asina check e situacion y probabilidad di e accident di e marduga aya.

   A laga un Polis tras di stuur di e auto, actuando riba declaracionnan di e sospechoso.  Un agente policial femenino a bay riba e E-Scooter pa e simulacro aki na Shiribana.

    E anochi aki, mas tanto e test tabata concentra ariba e velocidad cu e sospechoso a bisa, y kier a mira si e ta bisando esaki basa riba hechonan of ta djis inventa e storia.  Mas cu claro, no tin nada di evidencia mas pues polisnan mester traha cu locual cu tin y tras di palabra di e chauffeur.

    Pues asina polisnan mester a keda core ariba-abou y midi varios scenario basa riba velocidad, y tur esaki a wordo documenta.  Loke sali di e investigacion aki, autoridad lo tin di traha nan raport y presenta esaki.