Director di Fundacion SIKI, Jayburtt Dijkhoff
ORANJESTAD (AAN) – E director di Fundacion SIKI señor Jayburtt Dijkhoff, den entrevista cu DIARIO a menciona cu e plannan ta cu e Plataforma Pashentnan di Aruba, ta cuminza na un manera hopi verbal, unda nan ta vocifera nan opinion y preocupacionnan.
“Nos ta bay tin e plataforma unda nos ta bay colecta e opinionnan di diferente pashent, y ta bay tin un grupo activo tambe, den cual por tin mas contacto cu diferente organizacion di pashentnan di pashent cu ta biba bao di nan clientenan”, Jayburtt a señala.
El a agrega cu e idea tambe ta cu na dado momento lo mester presenta, por ehemplo, un website pa esnan cu ta mas digital, cu anonimamente nan por hasta pone nan preocupacionnan y kico nan a pasa door di dje, den henter e cadena di cuido. “Data importante akinan, cu por haci un cambio drastico, nos no tin” Jayburtt Dijkhoff a señala.
El a splica cu den e foro gubernamental, na unda cu tur cu tin di haber cu cuido di salud ta bay haya un asiento igual, y eynan nan lo por bay delibera con nan ta bay haci e cuido di salud hopi miho, y cada un ta trece nan perspectiva kico nan ta pensa. Y ta keda hopi importante, cu pashentnan tambe tin un asiento den e foro ey.
“P’esey nos a haci tambe e esfuerzo grandi aki, pa por mehora e posicion y e voz di e pashent”, señor Jayburtt a acentua y e ta aconseha pa sigui e facebook page “Siki Aruba” unda nan a lanza e plataforma Diabierna 28, pa keda den contacto anto eynan nan lo sigui duna mas informacion. “Y si bo kier ta un persona mas activo, of bo organizacion kier forma di e grupo activo, tambe por sigui nos riba nan p’asina bo persona por agrega bo persona of bo organizacion na e grupo aki”, Jayburtt Dijkhoff a conclui.
