Señora Michella Steenvoorde-Laclé:
ORANJESTAD (AAN): Señora Michella Steenvoorde-Laclé, Coordinadora di Plan di Mayor a enfatisa cu Plan di Mayor ta yuda mayornan distingui nan responsabilidadnan como mayor y ta guia mayornan cu no ta yega na un plan di mayor riba nan mes. Ley Plan di Mayor a drenta vigor desde 1 di maart 2024 y ta situa na MFA na Santa Cruz.
E ley ta encera cu mayornan cu ta bay separa tin e obligacion pa traha un plan di mayor pa cu nan yiunan indicando na e Huez con nan ta bay comparti nan responsabilidadnan pa cu nan yiunan. Plan di Mayor ta un paso responsabel pa futuro di e muchanan.
Steenvoorde-Laclé a indica cu Ley Plan di Mayor a cuminsa bon. Na 2024 tabatin 120 mayor cu a raporta pa asisti na un trayecto na Plan di Mayor. Mayornan ta haya un cita iniciativo na unda lo determina e grado di conflicto entre e mayornan y cua ruta ta pas mas cu nan.
Entre otro, Plan di Mayor tin un ruta hopi lihero pa mayornan cu ta riba mesun acuerdo di nan responsabilidadnan pero mester un tiki guia pa traha e plan di mayor.
Tin un ruta mas intensivo di mediacion familiar cu ta encera 6 sesion cu mayornan y un sesion cu e yiu. Aki e mayornan ta yega na un plan di mayor y e mucha ta yega na un plan di mucha. E mayornan ta wordo presenta kico ta e deseonan di e mucha y e yiu su plan di mucha ta bay directamente pa Huez hunto cu e plan di mayor y esey ta hecht aan na nan divorcio of separacion. Steenvoorde-Laclé a remarca cu mayornan den relacionnan informal tambe ta bon bini y cu mayoria di cliente ta mayornan cu ta den un relacion informal. Ta trata di mayornan cu no tabata sa pero a separa y awo ta traha nan plan di mayor.
Un otro ruta, e Ouderschap Blijft, ta pa e mayornan cu ta den un ‘vecht scheiding’ unda tin hopi conflicto den e relacion. E trayecto aki ta hopi intensivo y pa e periodo di 9 luna.
Steenvoorde-Laclé a duna di conoce cu for di e 120 cu a meld na Plan di Mayor na 2024, 79 trayecto a cuminsa y a cera e aña cu mas di 50 plan di mucha entrega na Corte. Te cu juni 2025, tin 29 plan di mucha entrega na Corte. Te cu awo a sobrepasa e aanmeldingen di 2024. Plan di Mayor a logra resultadonan positivo desde su introduccion. E cifranan aki ta muestra cu Plan di Mayor ta efectivo y mas y mas mayor ta mira e necesidad pa acudi na Plan di Mayor.
“Plan di Mayor ta yuda mayornan ‘zoom out’ di nan problemanan relacional y ‘zoom in’ na nan responsabilidad como mayornan. E bunita ta, diferente cu antes, aworaki mayornan mester responsabilisa nan mes y yega na un plan di mayor completo pa cu nan yiunan”, señora Michella Steenvoorde-Laclé a expresa.
