ORANJESTAD (AAN): Tabat Diabierna merdia, cu Centro MOC di Wardacosta di Caribe Hulandes,
a ricibi un yamada for di hendenan riba e isla Klein Curaçao. Nan a pidi asistencia medico pa un turista Mericano, kende a bira malo den e solo fuerte y tempo calor aki.
Centro di Operacion Maritimo a drenta den contacto cu Docter di CITRO, pa asina check su opinion riba e caso. El a indica cu e caso ta serio, y e persona mester haya atencion medico mesora.
Mesora a laga e Helicopter di Wardacosta lanta vuelo, pa bay busca e pashent na Klein Curaçao. Aki e pashent a wordo poni den e Helicopter, y asina a bay cu ne rumbo pa Aeropuerto di Hato. Aki Ambulance tabata sperando riba dje, y nan a hibe mesora direct pa Curaçao Medical Center (CMC) pa tratamento inmediato.
