Payroll Pro HRM tambe ta wordo usa awor na Radisson Blu Aruba

ORANJESTAD (AAN): Recientemente e equipo di mercadeo di Payroll Pro HRM a pasa bishita e resort mas nobo na Aruba, esta Radisson Blu Aruba, cu a bira cliente di e programa dos luna pasa.

   A sinta bebe un dushi cappuccino cu Jouraine Vrolijk (HR manager) na Sunset Bistro, e rooftop restaurant cu tin un infinity pool y un bista incomparable riba e lama y horizon di Aruba.

   Den un entrevista, Jouraine a splica con a yega na Payroll Pro: “Ora e management team a puntrami cua programa ami ta recomenda pa Payroll y HR, logicamente ami a propone Payroll Pro. Ya caba mi  tabatin cuater aña trahando cu e programa, for di e tempo cu mi tabata traha como HR supervisor na The Ritz-Carlton Aruba, y tambe como HR manager na Bonaire pa Marriott International. Mi sa kico mi por spera di e programa y di e servicio di Payroll Pro HRM. Pa mi e tabata e unico opcion.”

   Ora a puntra Jouraine con ta bayendo cu e programa mes, Jouraine ta añadi: “Nos tin actualmente dos luna trahando cu e programa y e servicio di Payroll Pro HRM ta hopi bon.

   Semper por yama si tin cualkier pregunta y mail ta worde contesta hopi lihe. Pa mi tabata hopi importante pa cuminsa di biaha cu e HR module hunto cu e parti di payroll, pasobra e ta necesario pa controla y keda up-to-date cu tur informacion di empleadonan. Y e portalnan ta yuda elimina tur e paperwork, nan ta hopi facil pa uza, y como manager pa wak tur ausencianan ta hopi overzichtelijk.”

   Jouraine ta comenta kico ta spera den futuro: “Ainda nos ta den e pre opening fase, pero por ripara si cu e mercado a cuminsa lanta back. Nos ta premira cu nos ta bay tin hopi mas huesped, pues, mas empleadonan y usuarionan di e programa. Ora nos ta zover mi lo organiza un training di Payroll Pro HRM on-site pa tur e empleadonan.”

   Radisson Blu Aruba, a habri official ariba 2 di april 2021 y tin 132 cambernan espacioso y moderno y tin en total 4 pool, di cual un di nan ta situa riba un dak.

   Payroll Pro HRM, e programa desaroya na Aruba door di programmeurnan local, ta existi desde 1993 y ta e software di HR y Payroll mas uza na Aruba y Caribe en general.