- Y tur esnan cu ta desaroya sector primario
ORANJESTAD (AAN) Muzaninn Wever, Parlamentario di Fraccion di Partido FUTURO, presidente di e Comision Fiho di Sector Primario, a expresa cu tin hopi reto den e sector aki, pasobra ta algo nobo cu e ultimo añanan ta tratando di desaroya pa Pais Aruba.
El a señala cu ya caba for di Gabinete anterior, Minister Wever a cuminza cu e trayecto aki pa trece innovacion riba e tereno aki cuminza move.
“El a trece plannan concreto pa por desaroya esaki hopi mas, pa nos. Retonan ta hopi, pasobra ora bo nunca a atende cu e cosnan aki, pa hopi aña, uno pasobra tereno ainda ta un issue, costo pa paga pa esaki, mi sa cu tabata tin acuerdonan hunto cu WEB Aruba NV pa haci awa hopi mas economico pa e cunukeronan, y esnan cu ta atende cu e sector aki”, Parlamentario Muzaninn Wever a señala.
Wever a subraya cu un reto ainda ta keda e asunto di coriente. Esaki ta algo cu mester resolve pasobra Elmar ta un compania cu pueblo ta doño di dje, y e mester ta un compania cu ta sirbi pueblo y no cu pueblo mester gasta placa pa e keda existi.
“Cu tur respet, e ta algo cu nos ta wak cu tecnologia ta cambiando, ma tin otro interesnan no solamente di parti di pueblo, pero ecologicamente pa nos medio ambiente, cu un compania estatal mester cambia cu tempo. Mi ta bay urgi gobierno tambe pa bay papia cu NV Elmar, pasobra e tin cu move cu tempo, y permiti cu pueblo ta beneficia di nos solo, pues amplia e posibilidad cu pueblo por tin panel solar, y cu e cunukeronan y hendenan cu ta traha den e sector primario tambe por desaroya esaki. Esakinan ta cosnan cu nos kier pa gobierno tambe papia cu NV Elmar pa reduci tarifa pa nan”, Parlamentario Muzaninn Wever a subraya.
