Gregory Fun-A-Fat:
ORANJESTAD (AAN) – Despues cu na April ultimo, nan a reuni cu Minister di Sector Primario, Geoffrey Wever, e comerciantenan cu ta bezig cu e mundo di agricultura a dicidi di presenta na Parlamento. Asina Gregory Fun-A-Fat a duna di conoce den entrevista cu Matutino DIARIO.
Fun-A-Fat a expresa cu ta importante pa Parlamentarionan tambe compronde tambe, ora ta papia di pilar economico nobo, e dificultadnan cu e agricultornan ta pasa aden.
“No ta solamente ora nos ta wak cu un cos ta bay bon y nos ta bisa cu tur cos ta cla pa nos bay dilanti. E ora ey, na April mi a topa cu e presidente di e Comision di Sector Primario, y e ora ey nos a haya e oportunidad di presenta, conhuntamente, cu e otro stakeholders, e dianan den Parlamento”, Fun-A-Fa a indica.
El a sigui splica cu e average y tur cos a bay hopi bon, y e presentacionnan cu e minister a trece dilanti ta na termino largo, y su vision ta pa ta bon. Santa Rosa tambe a haci un bon trabao, y Fun-A-Fa ta haya cu loke LVV ta haciendo ta di aplaudi.
“Pero tambe nos a presenta e dificultadnan y nos a pone riba papel cinco punto cu nos ta haya importante aworaki pa enfoca riba dje, p’asina nos, no solamente presenta, pero pone un tiki presion tambe cu nos mester nan yudanza; y Parlamento ta na un nivel mas halto cu mi ta kere nan mester ta al tanto”, Gregory Fun-A-Fat a señala.
Fun-A-Fat ta considera cu Minister Wever a haci un bon trabao pa introduci hydrophone, y aworaki tambe por wak cu tin un “Agri-innovation park” y tur e cosnan aki ta bon, pero pa bisa cu sector primario ta bira un pilar economico na 2026, Fun-A-Fat ta mir’e dificil.
“Mi ta bisa esaki no pasobra ami no ta wak e, pero wak unda nos ta awe. Wak cuanto dificultad. A wordo bisa duidelijk cu tin cosnan cu ta fo'i di man di e Minister ey précis. Dus, mi ta kere cu conhuntamente nos por traha pero 2026 ta dificil pa mi bisa cu e ta un economia caba. Mi ta kere si, nos ta den bon caminda di kico ta wordo haci, pero nos no tey ainda, si”, Gregory Fun-A-Fat a reitera.
El a subraya cu e ta kere cu e colaboracion entre e islanan ta importante. “Pasobra nos tur ta biba den un isla cu tin cosnan similar, pero e dificultadnan ta keda. Nos tur sa cu: 1) e transporte entre e islanan ta caro; 2) no tur ora nos ta gusta comparti informacion. Y, mi ta kere cu cosnan asina, cu e reunionnan cu a presenta, bo ta bisa mas y mas ‘ok, ban hacie’. Pero esey, atrobe, ta riba un base di LVV y ainda e no ta riba e base di e comerciantenan”, Gregory Fun A-Fat-representante di e gremio di agricultura, a vocifera.
