Como luna oficial dedica na nos grandinan, October ta yen di actividad:
ORANJESTAD (AAN)—Den conferencia di prensa di Fraccion di MEP, diaranzon mainta, a hiba palabra e parlamentarionan señor Alvin Medina, y señora Darlaine Guedes- Erasmus.
Darlaine Guedes a enfoca su mes riba e tema di adulto mayor y indica cu na Aruba tin mas of menos 25 mil adulto mayor.
“E persona aki a yuda bo crece, a influencia bo bida sigur, a haci un impacto den bo bida. E grupo aki, hopi biaha ta sinti nan mes vulnerable den nos comunidad. Por ehemplo, nan ta sinti soledad of cu nan salud hopi biaha ta bay atras, y tambe e sentimento di miedo cu nan por ta nan so, y cu no tin hende na cas pa yuda tira un bista riba nan.
Diabierna ultimo, mi tabata presente na un bunita Expo di biba bida. Akinan tabata tin hopi hende 60 plus, presente. Mi a bira hopi contento di a mira nan y por a comparti tambe cu nan. Tabata tin diferente tayer di trabao cu nos por atende”, Guedes-Erasmus a comenta.
E parlamentario a menciona cu Wilhelmina Kanker Fonds tabata presente, entre otro, ademas di a conta cu presencia di algun docter cu a duna un splicacion amplio tocante concientizacion di salud di nos grandinan.
E actividad aki, Guedez-Erasmus a sigui bisa, ta en conexion cu un schedule cu tin pa e Luna di October aki, cu ta special pa nos adultonan mayor, pasobra pa prome biaha, a declara e Luna aki, oficialmente, dedica na nos adultonan mayor.
E parlamentario ta encurasha tur adulto mayor y nan famia pa acudi na e eventonan aki. No solamente nan por haya informacionnan valioso hunto, pero tambe hunto nan por pasa pret. Asina Darlaine Guedes a bisa.
Tambe e kier a motiva e adultonan mayor y nan famia pa sigui participa na fundacionnan y instancianan cu durante henter e aña tin programanan pa nos grandinan. E actividadnan aki lo tuma lugar den centronan di bario na unda e adultonan mayor y nan famia por asisti.
Parlamentario Guedes-Erasmus a anuncia tambe, cu el a bira voorzitter di e Comision Fijo di Cuido na Nos Grandinan. E ta hopi contento cu esey pasobra e por sigui traha na bienestar di e adultonan mayor, door di invita instancianan y fundacionnan pa bin den Parlamento, na e Comisionnan Fijo, pa asina nan por papia riba diferente tema cu ta toca nos grandinan. El a agrega cu como Parlamentario, tambe e ta bay traha riba e leynan cu ta na bienestar di nos grandinan, locual ta hopi importante.
Pa finaliza, e parlamentario a expresa cu e kier a felicita tur nos grandinan pa e luna aki y gradici nan di curazon pa tur e esfuerzonan cu nan a haci pa construi nos pais, y tambe e norma y balornan cu nan a pasa pa e generacionnan mas hoben, y pa nan guarda tambe e norma y balornan aki. El a gradici tambe gobierno y fundacionnan pa haci e luna aki, un luna oficial dedica na nos adultonan mayor. “Pueblo di Aruba, ban sigui balora semper nos grandinan”, Darlaine Guedes a expresa pa conclui.
