ORANJESTAD (AAN)—Parlamentario Alvin Medina, durante conferencia di prensa di fraccion di MEP, Diaranzon mainta, a elabora riba dos tema:
Na prome lugar a referi na e hazaña di Heintje Ras, y na di dos, a papia tocante e Comisionnan Fijo di Parlamento.
SOSTEN Y ELOGIO PA HEINTJE:
Medina a dedica palabranan di elogio pa e ciudadano Heintje Ras, cu manera ta conoci e ta cumpliendo cu un hazaña, cu ta consisti di keda 100 dia den e mina di fosfat.
E Parlamentario, na prome lugar, a elogia Ras pa e meta cu e tin: Gana e “Guiness Book World Records” 2021, y cumpli cu su gran soño, cu ta, traha un mega museo di antiguedad di Aruba.
“Pakico e proyecto aki a cuminza? Esey ta e vision cu Heintje tin pa bin cu un mega museo di Antiguedad, na unda nos por admira mas cu seis mil artefacto cu ya caba el a colecta, y cu lo pone nos corda bek riba e Aruba di antes. Esaki ta algo hopi bunita, pasobra e por yuda nos preserva un pida di e historia y cultura di Aruba. Pesey mi kier pidi tur hende pa bay riba su facebook page, cu ta ‘hazaña mega museo Hentje Ras’, like share y si ta posible contribui tambe”, e parlamentario a trece dilanti.
Medina a agrega cu lamentablemente, den e temporada cu full mundo ta aden, ta dificil pa Gobierno por aporta of contribui financieramente, pero esey no a stop Heintje di lucha pa su vision.
El a subraya cu gobierno ta aporta si, pa yuda cu e permisonan necesario cu e diferente departamentonan cu mester ta den e sitio, vooral pa e seguridad di Heintje.
“Pero locual ta berdaderamente admirable ta cu nos por mira den e proyecto aki, cu ora tin union, trabao di grupo, determinacion, e ta posible pa bo logra cosnan grandi pa bo mes, pa bo famia, pa Aruba”, e parlamentario a bisa.
