ORANJESTAD (AAN) – E conferencia di prensa di fraccion di MEP, di cuminzamento di siman, a tuma lugar dilanti di Culture Café San Nicolas Store. Ademas di Parlamentario Arthur Vallejo, a hiba palabra Parlamentario Alvin Molina.
Parlamentario Molina a bisa cu esey ta e lugar unda dia 19 di Augustus, un momento historico a tuma lugar pasobra e dos partidonan cu a forma e coalicion (MEP-RAIZ) a firma nan plan di gobernacion pa aña 2021-2025.
Molina a bisa cu no ta sin mas a scoge pa e locacion aki, pero e hecho simbolico aki ta refleha e importancia cu San Nicolas ta bay tin, pa e gobernacion cu ta sinta awo.
E parlamentario a bisa cu tur hende sa cu pa hopi aña San Nicolas ta den decadencia, el a wordo neglisha y a keda atras, y esaki ta algo cu vooral esnan biba na San Nicolas ta sintie pasobra nan ta corda decadanan atras cu San Nicolas tabata e centro economico di Aruba, pero cu awo ta kedando atras, locual ta un lastima y no mester ta asina.
El a bisa cu cada bez cu tin campaña politico, e politiconan ta bisa cu San Nicolas ta bin na turno, pero nada ta sosode y incluyendo su mes ta haya duda, pero e gesto di e partidonan envolvi, di a firma nan acuerdo di gobernacion na San Nicolas y hasta den comienzo di gobernacion nan ta demostra e boluntad di traha riba San Nicolas.
“Awo ami como un representante di San Nicolas pa San Nicolas, sigur lo ferfela gobierno cu tur sorto di critica, pero preferiblemente tambe cu ideanan, con lo por logra e gesto cu nan a demostra dia 19 di Augustus akinan”, Molina a bisa.
Cu critica y ideanan propio pero tambe di hende di pariba di brug, y eigenlijk di full Aruba, cu cada bez mas ta realiza con importante ta pa inverti den San Nicolas. El a bisa cu si San Nicolas ta crece, si e ta booming, full Aruba ta bay goza di dje.
El menciona e diferente lugarnan cu San Nicolas tin, cu ta su tesoronan, unda hendenan por pasa come, y e lugar unda nan a duna e conferencia di prensa, cu cantidad di turista ta bishita. Pero San Nicolas mester di hopi mas cu esey, Molina a subraya. Por ehemplo, e mucha y hobennan na San Nicolas pa nan no tin nada pa haci y tampoco pa e grandinan.
“Con nos por preveni pa nos muchanan no bay riba un caminda robes of mal caminda si nos no ta ofrece nan, algo positivo pa haci. Con nos kier preveni pa nos muchanan no wordo abusa, si nan ta for di mundo cera den nan cas, of peor ainda, tira pa nan cuenta riba caya? Ta nos tin cu organiza y percura pa nos muchanan tin deporte, arte, musica, recracion, na un manera positivo cu nan por desaroya nan mes”, Parlamentario Alvin Molina a señala, agregando cu di mes esey ta bin cu desaroyo di e infrastructura necesario pa haci tur esey posible.
