Pa luna di Maart 2023 e resultadonan di Turismo ta sigui impresionante

ORANJESTAD (AAN): Minister di Turismo y Salud Publico sr. Dangui Oduber ta comparti e ultimo resultado di Aruba su turismo cu a keda publica pa ATA.

E cifranan di luna di maart 2023 nos turismo ta sigui impresionante segun e mandatario.

   Te cu awor tur luna den aña 2023 a sobrepasa esun di aña 2019. Den luna di maart 2023 Aruba a ricibi 109.295 turista stayover. Esaki tabata un recuperacion di 102% den comparacion cu maart 2019.

   Pa e promer cuartal di aña 2023 Aruba a ricibi 306.305 turista cual ta 4.1% mas hopi cu e promer cuartal di aña 2019.

   E mandatario ta remarca cu aña 2019 tabata e mihor aña den historia pa nos turismo y ta pesey ta uza aña 2019 como e aña di referencia ora ta fiha riba e strategia di recuperacion.

   “Aruba su resultado ta impresionante y esaki sigur ta danki na e bon sinergia y “teamwork” cu tin entre Ministerio di Turismo y tur e partnernan den turismo”

Minister Dangui Oduber ta yama danki na Aruba Tourism Authority (ATA), Aruba Ports Authority (APA) N.V., Aruba Hotel and Tourism Association (AHATA), Aruba Time Share Association (ATSA), Aruba Airport Authority (AAA), Aruba Vacation Rentals Association. Danki tambe na tur departamento di gobierno y tur cu ta labora den e industria pa e tremendo resultado aki.

   “Nos mester ta orguyoso cu e prestacion aki!” e mandatario ta termina bisando.