Oficina di Directie Koninkrijksrelaties en Europese Unie ta paso strategico pa futuro di Aruba

ORANJESTAD (AAN): Gobierno di Aruba a celebra e apertura oficial di e Directie Koninkrijksrelaties en Europese Unie,

un paso importante den fortalecemento di e relacionnan den Reino Hulandes y cu Union Europeo.

   E momento historico aki a reuni lidernan local y internacional, entre nan e Prome Minister di Aruba, Mike Eman, Minister di Relacionnan den Reino y Asunto Europeo, Gerlien Croes, Comisario Europeo pa Asociacionnan Internacional, Josef Sikela, y Secretario di Estado pa Relacionnan den Reino, Eddie van der Burg.

   Den su discurso, Prome Minister Mike Eman a enfatisa cu e apertura di e directie ta un señal cla cu Reino y Union Europeo ta bira un prioridad strategico pa Aruba. El a indica cu e oficina nobo lo contribui activamente na informa comunidad, desaroya politica y crea oportunidadnan nobo pa bienestar di pueblo. Segun e Prome Minister, cooperacion internacional no ta basa solamente riba recurso financiero, sino riba e conviccion cu hunto nos ta mas fuerte cu separa.

   Minister Gerlien Croes a mustra aprecio pa e colaboracion amplio cu a haci e iniciativa aki posibel. El a destaca cu e restablecemento di un oficina dedica na Relacionnan den Reino y Union Europeo ta demostra vision y perseverancia. El a subraya cu Aruba mester posiciona su mes como un socio activo y strategico den e contexto di Reino y Europa, cu enfoke riba desaroyo sostenibel, innovacion y oportunidad economico.

   Comisario Europeo Jozef Sikela a confirma e compromiso di Union Europeo cu e paisnan y territorio di ultramar (OCTs), incluyendo Aruba. El a enfatisa cu, aunke Aruba ta parti di famia Europeo, pa hopi hende Union Europeo ainda ta parse leu. E directie nobo lo sirbi como un punto directo di contacto pa ciudadano, compania, investigadornan y institucionnan, facilitando acceso na programanan Europeo manera Erasmus+, Horizon Europe, Connecting Europe Facility, Digital Europe y European Solidarity Corps.

   Segun Comisario Sikela, e oportunidadnan aki, specialmente pa hobennan, mester wordo utiliza na su maximo potencial. El a anuncia tambe cu ta trahando pa amplia – y hasta redobla – e presupuesto disponible pa OCTs den proximo presupuesto di Union Europeo, cu lo resulta den mas recurso, mihor acceso y un asociacion mas fuerte.

   Durante su intervencion, Secretario di Estado Eddie van der Burg a recalca cu e reunionnan di e siman aki no ta trata solamente di financiamiento, sino di fortalecemento di conexionnan. El a indica cu den un mundo geopolitico compleho, cooperacion ta esencial, specialmente den area manera conectividad, energia y siguridad alimentario. El a enfatisa cu e balor principal ta den conecta hende, paisnan y institucionnan, fortaleciendo e lasonan entre Aruba, Hulanda y Union Europeo.

   Gobierno di Aruba ta considera e apertura di e Directie Koninkrijksrelaties en Europese Uni como un logro importante y un inversion den futuro di e pais. E iniciativa ta confirma e compromiso continuo pa amplia oportunidadnan internacional, fortalece posicion estrategico di Aruba y crea un base solido pa prosperidad sostenibel pa tur ciudadano.