Ocho empleado di DWH a termina opleiding di Buitengewoon Agent van Politie

Minister Dangui Oduber

ORANJESTAD (AAN):  Diahuebs anochi a tuma lugar un ceremonia special na Surf Side Marina, caminda 8 empleado di Dienst Warenkeuring en Hygiene (DWH) a ricibi nan certificado di Bijzonder Opsporingsambtenaren (BOA) despues di a completa e opleiding Buitengewoon Agent van Politie.

            Departamento di DWH ta un departamento cu ta resorta bou di Departamento di Salud (DVG) y ta consisti di 3 subdivision cu ta afdeling Waren, afdeling Sanitaire Inspectie y afdeling Foodhandlers. Durante e periodo di oktober 2021 te cu mei 2022, 8 personal a sigui e opleiding di BOA. E personalnan aki mester a hasi algun test e.o. psychologische test, aantecedentenonderzoek, verklaring van Goed Gedrag etc. pa por a wordo accepta na e opleiding, di cual tur 8 personal e a wordo admiti.

            E formacion basico di Buitengewoon Agent van Politie ta pa haya conocimento general ariba algun derecho y conocemento specifico ariba diferente delito penal, sancion y reglanan den proceso di derecho penal. Cu e certificacion aki ta fortifica e departamento den su funcionamento na momento cu mester actua ora cu tin incumplimento di ley.

            Ley cu ta wordo supervisa ta e.o. Vergunningsverordening, Vergunningsbesluit, Warenverordening, Personeelsbesluit warenverordening, Landsverordening infectieziekten, Begrafenisverording, Crematieveordening, Landsverordening verzorgingshuizen.

            E proposito di e curso tabata pa capacita nos inspectornan den salud publico pa mantencion di orden publico y seguridad. Awor e ambtenaar cu tin un opsporingsbevoegdheid specifico ariba e leynan y regulacionnan cu ta regarda su tarea, por investiga si algun delito a wordo cometi di manera cu e mes por traha un procesverbaal of skirbi un boet.

            Minister Oduber a duna un pabien na tur e 8 personal di DWH cu a obtene nan BOA Diploma; sra. Ludmyla Y. Geerman, sr. Roberto A. Geerman, sra. Shirley T. Williams-Spanner, sra. Sylvette C. Croes-Ruiz, sra. Edna S. Marsera-Sint Jago, sr. Gregory R. Vrolijk, sr. Patrick M. Laclé y sr. Alfred A.J. Geerman.

            Tur a wordo gradici pa nan tempo y dedicacion pa e trabou cu nan ta hasi tur dia, pero sigur tambe pa cu e logro di e curso aki. Paso e conocemento ricibi ta importante pa nos por progresa como pais y tambe pa sigura e calidad di seguridad di tur nos ciudadanonan.