Audrey Croes, PR di NV ELMAR:
*Empleadonan di ELMAR ta comparti preocupacion di pueblo
ORANJESTAD (AAN) – Audrey Croes, Relacionista Publico di WEB Aruba NV, den conferencia di prensa di Diabierna, organiza pa Utilities Aruba NV, WEB Aruba NV y NV Elmar, a hiba palabra, tambe pa concientiza comunidad riba consumo di coriente y spaar esaki.
Croes a menciona cu e average di consumo di coriente na Aruba ta di 700 kilowatt uur pa hogar, pa luna, cu, compara, por ehemplo, cu Curacao ta mas halto. Na Curacao nan average di Kilowatt uur ta 350 kilowatt pa luna.
Audrey Croes ta kere cu, como comunidad, Aruba tin espacio pa uza menos energia y spaar mas coriente, mas lihe. “Esaki ta bon pa bo cartera, pero tambe pa e medio ambiente, pa asina aki por combati tambe e desaroyonan mundial, cu e directornan a papia riba dje”, señora Croes a señala.
Algun tips chikito y facil pa spaar energia, ta pa uza sun shades pa haci e ambiente rond di cas mas fresco, por cambia e bombionan pa LED. Tambe Croes ta recomenda pa tur dia revisa e cas, y tuma momentonan pa wak si tin aparatonan cendi cu no tin mester, desconecta e plugnan di aparatonan cu no ta den uso, paga television prome cu bay drumi, paga radio prome cu sali for di cas, paga luz di cambernan cu no ta den uso, cera porta di cambernan cu tin airco cendi.
ELMAR tambe ta dispone di un calculator online, pa consumidor calcula su uso di coriente segun su cantidad di uso di kilowatt uur. E por yuda e consumidor sa si e ta ariba of abao di e average di Aruba pero tambe di e average cu normalmente e ta uza, of tin stipula den su presupuesto pa uza.
Señora Croes a expresa cu ELMAR ta comparti e preocupacion cu tin den comunidad y e ta preocupa e empleadonan di ELMAR cu tambe ta cumpra coriente. Finalmente, el a pidi pueblo pa sigui ELMAR via rednan social pa asina por sigui e desaroyo di prijs di coriente di NV ELMAR.
