Premier Wever-Croes:
ORANJESTAD (AAN): Prome Minister Evelyn Wever-Croes a haya un pregunta durante e conferencia di prensa di Gobierno dialuna mainta caminda a puntr'e cua ta e motivo cu ainda no a apunta un director pa Departamento di Obranan Publico (DOW).
E mandatario a indica cu e motivo di esaki ta pasobra a bay eleccion y tin un gobierno demisionario. El a agrega cu Sr. Marlon Croes a informa hopi na tempo di su retiro y na e momento ey a habri e solicitud. El a wordo publica y tin candidatonan cu a solicita y e proceso tabata andando, casi kedando cla.
Despues di eleccion, mirando e resultado di eleccion y cu probablemente ta bay bin un gobierno nobo, e mandatario a prefera pa e nombramento di e direccion tuma luga door di su sucesor.
Wever-Croes a reitera cu tur cos ta cla. E proceso a wordo encamina y ta practicamente na final, pero pa e toma di decision ta mihor pa e minister nobo tum'e. "Mi kier a evita cu si ami tuma e decision eynan, e minister nobo ta bin y e ta sinti cu talbes tabata di un otro constelacion of algo asina. Mi n' kier pa nada stroba e nombracion pasobra no tabatin ningun influencia politico den dje. Mi mes no tabata parti di dje. E tabata den un comision totalmente independiente. Dus esaki ta keda pa e minister nobo y e ta bay tin chens pa haci esaki mesora cu e bira minister", el a bisa.
Un di e puntonan di salida di e gobierno demisionario ta cu nan mag di atende solamente cu asuntonan coriente. Ora ta trata nombramento di personal cierto por, pero ora ta trata di directornan di departamento, esey como gobierno demisionario no por haci, el a enfatisa.
