Minister Ursell Arends cu primicia:
ORANJESTAD (AAN) – Como titular demisionario di Medio Ambiente, Minister Ursell Arends den entrevista cu DIARIO, a declara cu e tin un primicia pa pueblo, y esaki ta cu despues di a delibera cu tur e partnernan cu a forma parti di Baki den Bario, y cu alavez cu el a bay Ministerraad mirando cu tin peticion grandi di comunidad pa continua cu e proyecto aki, a dicidi pa ubica fondonan pa den lunanan di Maart y April proximo, esaki lo tuma lugar.
Baki den bario lo tuma lugar dia 8 di Maart y 5 di April, den e tereno net dilanti di Daltra, pabao di Arugas. “E tereno aki a wordo haci posible danki na Gomez Enterprises, y di e forma aki e baki den bario ta bay ta den un lugar central na Barcadera, y esey ta haci cu comunidad por yega mas frecuente y cu mas facilidad eybanda, y mas cu tur cos lo no ta obstaculizando e trafico riba camindanan grandi”, Minister Ursell Arends a duna di conoce.
E minister a agrega cu tur e partnernan ta participando den esaki, p’asina aki por sirbi y cumpli cu e demanda cu tin den e comunidad di Aruba.
“Y manera nos ta bisa semper, comunidad mester prepara. Separa e desperdicionan di antemano, pa ora e fecha yega nan por bin cu esaki tambe separa”, Arends a señala.
El a agrega cu ademas di ta mas facil pa yega, e companianan cu ta procesa e desperdicionan tambe ta den cercania, locual tambe ta haci cu e fluho di trafico ta bay ta mas lihe.
“E ta na su lugar tambe cu e Gobierno entrante analiza esaki y continua cu Baki den Bario, mirando cu di un forma of otro, trahando hunto cu e partnernan, pero tambe colaborando cu nos comunidad nos ta logra mantene nos pais limpi”, minister Ursell Arends a remarca. Tur hende cu ta cliente di Serlimar por yama, prepara su desperdicio, y Serlimar ta bin buske y hibe na e baki. Asina e minister a bisa, finalmente.
