Musiconan ta cla pa duna un tremendo show riba tur dos anochi final di ACSM2024

Evento final lo ta dianan 26 y 27 di Januari

ORANJESTAD (AAN): Recien Stichting Musica a yama un reunion cu musiconan den cuadro di e Aruba Caiso & Soca Monarch (ACSM) Finals.

   E organizacion a habri e reunion cu un aplauso y a complimenta e musiconan riba e presentacion cu nan a duna durante e Soca Prefinals. Cada artista y banda a sali afo cu yen di animo y por a nota con e publico presente y esnan cu a sigui e transmision for di na cas tabata entusiasma y a biba e momento hunto cu nan door di grita, baila, apoya, like, share y comment.

   Stichting Musica a duna informacion relata na e planning di e dos anochinan final y a duna tur cantante y lider di banda presente e oportunidad pa haci pregunta y duna sugerencia. Diferente opcion a worde treci dilanti, di cual esnan presente a unanimamente dicidi pa combina e categorianan Caiso y Groovy Soca riba diabierna, 26 di januari 2024 y e categoria Power Soca riba diasabra, 27 di januari 2024.

   Despues di e Prefinals, Stichting Musica asigui di biaha cue preparacionnan pa e gran ACSM Finals y a haci un calculacion di tempo basa riba e cantidad di banda, artista y cantica cu a pasa pa e Soca Finals hunto cue cantidad di inscripcion ricibi pa e categoria di Caiso. Manera tur promotor, Stichting Musica ta ricibi un permiso pa organiza e evento y mester cumpli cu e horario stipula pa e festival. Ora cu a calcula e combinacion di Groovy Soca& Power Soca riba un solo anochi, esaki a resulta den mas o menos 10 ora di show cual no ta ideal. Pa e motibo aki a yama tur hende hunto pa delibera riba otro opcion.

   Presidente di Hurado, sr. John Hassell, tambe tabata presente y ora cu e decision a worde tuma, a confirma cu riba e prome anochi lo saca e ganador di ambos categoria Caiso y Groovy Soca na final di e anochi ey mes.  Riba e di dos anochi lo saca e ganador di e Power Soca. Esaki kiermen lo tin hopi suspenso durante tur dos anochi y cu Aruba lo por celebra Carnaval 70 cu dos anochi grandi di musica y entretenimento.

   Stichting Musica ta satisfecho cu e presencia di mayoria lider di banda na e reunion y a urgi nan pa comparti e update importante aki cu nan miembronan di banda. Lidernan di banda y cantantenan cu no tabata presente por tuma contacto libremente cu señora Inky Richarchson di Stichting Musica pa ricibi mas detayes of splicacion. E organizacion ta gradici tur musico cu a participa na e reunion, cu a trece puntonan valido y diferente consideracion padilanti, pa por a evalua e situacion riba un nivel profesional y na final yega na un solucion hunto.

   Un recordatorio ta bay na tur participante di ACSM2024, cu segun Rules and Regulations di e contest, tur lyrics pa e categoria di Caiso mester worde entrega pa dia 15 di januari 2024 na Cette adresse e-mail est protégée contre les robots spammeurs. Vous devez activer le JavaScript pour la visualiser..

   Tambe, cada cantante mester avisa oficialmente si nan lo haci uzo di video y efectonan special durante di nan show. Lidernan di banda mester entrega nan band list completo pa dia 24 di januari 2024 na e mesun e-mail adres aki.