Mobile Team di DVG cu charla informativo den hotelnan y comercio pa esnan cu ainda falta pa vacuna

ORANJESTAD (AAN):  DVG su Mobile Team a cuminsa duna charla informativo den sector hotelero pa empleadonan cu ainda falta pa vacuna of cu tin algun duda.

Durante dos dia trahadornan di Hilton Aruba Caribbean Hotel a haya informacion di Mobile Team di DVG.

E empleadonan tabata tin e oportunidad di haci pregunta riba tur nan dudanan y tambe por a registra pa vacuna. Dr. Wilmer Salazar a duna promer un charla cortico di e situacion mundial y local di e pandemia y alaves a duna informacion detaya di e vacuna cu Aruba ta brinda; esta di Pfizer Biontech. Despues di e charla empleadonan por a haci preguntanan mas personal tambe na Dr. Salazar.

E trahadornan a keda sumamente contento y esnan cu a tuma nan decision pa vacuna por a registra di biaha serca representante di DVG presente. Hotel y Companianan cu ta interesa pa e charla informativo aki di DVG su Mobile Team por tuma contacto na email Cette adresse e-mail est protégée contre les robots spammeurs. Vous devez activer le JavaScript pour la visualiser..

Nan lo wordo asisti pa planea nan evento segun nan situacion y orario adecuado pa e trahadornan.