ORANJESTAD (AAN) Minister Mervin Wyatt-Ras, titular di Salud y Asunto Social, tambe a elabora tocante e evento Fiesta di Cunucu,
cu lo tuma lugar Diadomingo venidero y cu ta dirigi na nos adultonan mayor.
E mandatario ta haya hopi importante pa nos adultonan mayor intercambia cu pueblo, unda nan por comparti e experiencia cu nan tin cu comunidad, hunto, den un ambiente ameno.
E ta corda cu nan a firma tempo pasa un MOU, unda a bin cooperacion entre e ministerionan, e departamento di Adulto Mayor, y tambe e sector primario y Santa Rosa, p’asina nan por stimula intercambionan y participacion di e adulto mayor den comunidad, y e traspasonan cu tin di e experiencianan cu tin, di adulto mayor pa nos futuro generacion, segun e dignatario a señala.
“Y den un lugar asina bunita den naturaleza, meymey di tur e animalnan cu tin na Santa Rosa, un espacio hopi bunita, mi ta kere cu e conexion entre naturaleza, locual ta di tera cu nos mester proteha, salvaguardia y transmiti tambe amor pa tera, no solamente door di nos grandinan pero tambe pa nos futuro generacion, door di eventonan asina, como tal, nos por logra esaki”, Minister Wyatt-Ras a relata.
El a agrega cu di su ministerio tin tur cooperacion pa esaki, y cu pueblo merece cu nan ta pone atencion na nos adultonan mayor.
“Nos tambe, como Ministerio, ta enfoca hopi riba e participacion di adulto mayor den comunidad y e compartimento di adulto mayor cu pueblo, y tambe e convivencia cu nos mester tin cu comunidad, e amor pa otro, e intercambio cu nos mester tin den comunidad cu otro, y mi ta kere cu den un actividad asina, na Santa Rosa cu tur hende conoce ya cu nan tin nan mercado unda hende por cana rond y cumpra productonan local, nan por comparti cu otro y asina tambe den un ambiente ameno. Hasta musica y baile mi a compronde, pues tin hopi actividad y un programa hopi bunita, y pueblo tambe por bin goza cu nos adultonan mayor den e fiesta aki. Mi ta invita un y tur pa Diadomingo 28 di Juni bin pasa akinan”, Minister Wyatt-Ras a señala.
