Minister Tjon a reuni cu departamentonan di Husticia den cuadro di proyecto di edificio ex-Codemsa

ORANJESTAD (AAN)- Dialuna durante dia, Minister di Husticia y Asuntonan Social Sr. Rocco Tjon a reuni cu e diferente departamentonan di Husticia.

Manera a wordo anuncia algun luna atras, e proyecto caminda diferente departamento di Husticia lo bay muda pa e edificio di Ex-Codemsa, ta den pleno ehecucion.

            Den cuadro di esaki, a reuni cu Cuerpo Policial, Inmigracion, Bureau City Inspector y CEA, caminda a logra determina e necesidadnan concreto cu nan tin mester di dje, pa asina nan por ubica nan trahadonan. Pues un proyecto sumamente importante pa Ministerio di Husticia.

            E proyecto aki ta importante, pa motibo cu ora ubica e diferente departamentonan di husticia bou di un solo edificio, esaki lo percura pa procesonan ta miho alinea pa trabaonan por wordo miho ehecuta, tambe lo percura pa brinda un miho servicio na henter nos comunidad. Locual tambe ta hopi importante, ta cu lo percura pa e trahadonan tin e espacio y circumstancianan necesario pa por haci nan trabaonan, locual nan tin derecho riba dje. Nan condicionnan di trabou lo ta hopi mas miho di locual nan ta actualmente.

            Por ultimo, e Mandatario a indica di a ricibi e draft final, den cual a delinea e necesidadnan di cada departamento. Pronto lo bay entrega y presenta esaki na APFA, pa di e forma ey, mas tarda den luna di Mei, por presenta e concepto di Ley pa cu esaki den Parlamento di Aruba, pa asina e proyecto aki por wordo aproba y pa e trabaonan mes por cuminsa.

            Di e forma aki,  e trahadonan lo por traha bou di circumstancianan hopi mas miho, y lo por brinda un miho servicio na nos comunidad. Adicionalmente, e proyecto aki lo percura pa baha gastonan, cual lo resulta cu por bay haci hopi mas cu e recursonan limita cu nos tin.