ORANJESTAD (AAN): Minister Plenipotenciario Guillfred Besaril recientemente a ricibi bishita di e embahador di Nigeria na Hulanda dr. Eniola Olaitan Ajayi.
E embahador Olaitan Ajayi kier a cera conoci cu e representante di Aruba na Hulanda y alavez e ta haya hopi importante pa mantene bon contacto cu tur e paisnan den Reino Hulandes. Durante di e bishita a papia riba diferente topico, manera enseñansa y salubridad publico. Embahador Olaitan Ajayi a bisa Minister Besaril cu Nigeria ta hopi interesa pa papia cu Aruba riba manera pa desaroya e sector di turismo. Nigeria ta reconoce cu Aruba tin hopi experticio riba e tereno aki y pesey embahador Olaitan Ajayi a bisa cu e ta planea pa bishita Aruba fin di November e aña aki y asina banda di otro compromisonan, intercambia di idea riba esaki cu ATA.
Minister Besaril a bisa embahador Olaitan Ajayi cu Arubahuis sigur lo brinda tur sosten necesario conhuntamente cu Aruba pa haci e bishita uno exitoso. Como aprecio pa e bishita a tuma lugar intercambio di regalo entre embahador Olaitan Ajayi y Minister Besaril. Potret cortesia di Cas di Aruba.
