Minister Gerlien Croes ta felicita Fontein Kleuterschool cu nan 35 aniversario

ORANJESTAD (AAN): Dia 19 di mei, Minister di Enseñansa y Innovacion, mr. Gerlien Croes,

a asisti na e celebracion di e di 35 aniversario di Fontein Kleuterschool, un scol cu a crece hunto cu su comunidad y a duna un base firme na hopi mucha riba Aruba.

            Fontein Kleuterschool a habri su porta na 1988 cu un solo klas chikito, den cura di scol bisiña, Prinses Wilhelmina School. Na 1990, el a haya su di dos klas y a tuma su propio nomber como Fontein Kleuterschool. Finalmente den añanan 2000 Fontein Kleuterschool a habri su mesun edificio. Awendia, e scol ta brinda enseñansa cu amor y compromiso, y ta forma un parti importante den e bario di Fontein.

            Durante e celebracion, Minister Gerlien Croes a ricibi un presentacion special di e alumnonan y a celebra hunto cu e ekipo di docente- y asistentenan dedica. Cu cariño, guia y atencion, e scol a yuda forma hopi generacion di hoben, cual lo sigui sinti su impacto pa e generacionnan binidero.

            Ministerio di Enseñansa y Innovacion ta felicita Fontein Kleuterschool cu celebracion di su 35 aniversario. Danki na tur e maestra(o) y asistente cu ta brinda e guia y atencion na nos futuro generacion. "Scolnan manera Fontein Kleuterschool ta na e centro di nos vision pa un enseñansa mas inclusivo, moderno y cu oportunidad pa tur mucha", Minister Gerlien Croes a termina bisando.