Tremendo iniciativa di Fundacion Savaneta Prome Capital:
ORANJESTAD (AAN) Minister di Economia y Finanzas, señor Geoffrey Wever, a hiba palabra den e conferencia di prensa yama pa Fundacion Savaneta Prome Capital, den cuadro di nan proximo evento “Savaneta Seafood Festival”.
Minister Wever a expresa cu e tambe ta contento di ta parti di e bunita iniciativa aki. “Ora cu meneer Thijsen a menciona cu el a bin hunto cu San Nicolas Business Association (SNBA), pa papia di e proyecto aki, nos a bisa cu e ta conforme cu e vision di nos Ministerio di Sector Primario, den e caso aki, unda cu nos kier stimula Agricultura y Cria, pero tambe sector di Pesca. Y esaki ta un proyecto cu ta na beneficio di e sector di pesca, di nos piscadornan, y di fishing contest y un seafood festival, caminda cu bo ta trece cuminda fresco di biaha di lama pa tayo, y asina haciendo di e area aki algo iconico.”
“E ta conforme e vision di nos Ministerio tambe, y mi ta contento cu nos por a forma parti hunto cu e Fundacion Savaneta e Prome Capital, pa uni nos mes na e bunita proyecto aki”, Minister Geoffrey Wever a señala.
E dignatario a subraya cu pa nan ta importante pa nos hendenan participa den e industria di pesca, por ehempel, y tambe stimula locual ta di nos. El a bisa cu pa su persona tambe cu su raiznan ta core profundo den Savaneta, y como mucha el a landa den tur e laman aki, y den e area di e pier ey tambe, ta haci’e hopi contento y orguyoso di forma parti, den nomber di Gobierno, den e proyecto aki.
“Ami ta hopi gradici tambe di e iniciativa cu Fundacion Savaneta Prome Capital a tuma pa organiza esaki, y pa tin partnernan asina importante manera ATA y CEDE on board, pa hunto logra algo bunita. Señor Thijsen a menciona, un grupo di 50 boluntario y partnership di SNBA, y duna Savaneta un bunita proyecto cu por ripiti y bira algo autentico di Savaneta”, e dignatario a remarca.
