Defensa militar ta kita bista for di problema grandi Reino Hulandes
- Rotterdam ta “Europoort” y alma di negoshi petrolero Europeo
- Desaroyo azeta na Hulanda tambe ta determina prijs mundial
ORANJESTAD(AAN) Kico medidanan di cambio di clima finalmente lo haci cu Hulanda, cu Rotterdam, cu ta porta central di economia mundial di azeta y uno di e basenan inclui den e calculacionnan pa prijs mundial di azeta?
Aruba ta depende di loke ta pasa na Hulanda, e partner mas poderoso den Reino Hulandes riba tereno financiero y economico.
Tabata tin motibo cu un pais chikito manera Hulanda, por a crece den un historia sumamente interesante, cu a percura pa Aruba tambe bira parti di desaroyonan internacional cu no tabata tin coneccion directo cu Aruba.
Ora papia di Hulanda ta papia di un pais cu a nace for di laman, pero hustamente pa papel di laman a bira e punto di contacto poderoso entre un cantidad di pais di Europa y resto di mundo.
Ora papia di Rotterdam ta papia di Europoort, cu ta e coneccion maritimo pa motibo di rionan cu ta conecta Hulanda cu centronan comercial Europeo.
Tabata e crecemento enorme di e industria petrolero na Hulanda cu a causa e factor di migracion ya cu mester a importa trahadornan pa e comercio gigante petrolero na Hulanda.
Uno di e nombernan internacional cu Hulanda tin ta “Pais di Maas y Waal” e dos riunan cu ta defini e papel importante di e rutanan maritimo cu a percura pa e problemanan actual di Hulanda, cu mester a atrae trahadornan for di cantidad di pais pa asina traha den su economia.
Companianan mundial mas grandi di petroleo na nivel mundial, tin Rotterdam y Hulanda como centro di nan operacionnan internacional.
Lamentablemente tur atencion actualmente ta worde dedica na e problemanan di Hulanda y su relacion cu NATO. Sinembargo, Hulanda tin un problema mas serio cu ta bini dilanti den e asuntonan cu ta bira crucial den mundo politico y sigur pa proximo eleccion y cu ta directamente mara na cambio di clima tambe.
Tin un motibo pues cu e parti Sur di Hulanda y sigur Rotterdam ta hunga un papel importante ora papia di migracion y situacionnan social cu ta presenta na Hulanda.
E posicion fuerte di Geert Wilders ta directamente mara na loke ya a bini dilanti den partido manera BBB cu a cuminsa lanta para pa e gruponan di agricultornan y ciudadanonan Hulandes cu un raiz di hopi tempo y hasta pa Arubianonan cu tin hopi tempo biba na Hulanda.
E derechonan y bienestar di e Hulandes realmente a worde afecta pa migracion cu a cuminsa den e necesidad di Hulanda pa importa trahador entre otro pa e partinan Sur di Hulanda den e papel mundial cu Hulanda como centro industrial petrolero internacional, a bay ocupa.
Rotterdam ta hunga e papel principal den e desaroyo economico, financiero y social di Hulanda cu hasta a bira un centro financiero pa e simpel motibo cu e ta “Pais di Maas en Waal”.
E placa cu e trafico maritimo cu ta pasa den e curazon di Hulanda for di Europoort te e paisnan cu no tin haf na Oceano Atlantico, a produci a permiti Hulanda asisti Aruba cu financiamento.
Awe Hulanda ta lomba contra muraya y mester a cuminsa atende cu e amenaza di cambio di clima, cu a exigi medidanan na Noordzee pero tambe rond e pais cu ta bira victima di e pasashi Maritimo y problema pa naturaleza.
Na e momentonan aki no ta solamente pa NATO pero tambe pa cambio di clima, Hulanda como uno di e paisnan mas rico di mundo, mester atende cu su economia y cambionan cu ta exigi un peso financiero pa adapta na cambio di clima cu asuntonan serio cu ta e produci.
Informacionnan Hulandes ta mustra mas y mas comn campesinonan ta worde afecta den nan produccion y bida Hulandes ta worde amenaza pa un economia, di cual Rotterdam ta simbolo.
Cu un poblacion internacional, Rotterdam como puerto principal di Europa mester inverti sumanan enorme den e adaptacion di henter economia Hulandes na cambio di clima.
Hulanda ta hunga un papel central den e mundo di petroleo na Europa pasobra Rotterdam ta e hub di azeta pa Europa y mester cambia su negoshi den combustibel completamente.
Hulanda como centro petrolero, ta uno di e paisnan cu mundialmente ta dicidi pa prijs di petroleo pasobra ta Rotterdam ta uno di e centronan poderoso pa transporte di productonan petrolero y maritimo.
E hecho cu awe Hulanda ta exigi autonomia financiero di Aruba, ta resultado di e problema cu Hulanda como pais mas grandi den Reino y centro di refinerianan cu poder mundial, mester soluciona.
Na Aruba mas y mas informacion cu ta worde duna na Pueblo mester cuminsa worde adapta na realidad mundial, cu resultado directamente pa Aruba.
DIARIO sigur lo sigui informa na un momento culminante pa economia mundial y asina pa Reino Hulandes cu a depende di e situacion financiero di Hulanda, uno di e gigantenan mundial ora papia di negoshi di azeta, cu a cambia profil di e trahador Hulandes den e Era di Petroleo!
