Asina gobierno di Aruba tey como partner --- ORANJESTAD (AAN) -- Minister di Economia señor Geoffrey Wever, a hiba palabra durante e lanzamento di e website nobo pa IDEA,
y el a expresa su satisfaccion di ta presente y mira con e team dinamico di e personal di Directie Economische Zaken ta keda tuma iniciativa, pa yuda motiva e comerciantenan y stimula Aruba su economia y el a bisa cu e ta contento di wak esaki.
“Un website manera esun di IDEA ta hopi importante pasobra esnan cu ta comerciante caba of cu kier bira comerciante, sa cu esaki no ta facil. E clientenan cada bez ta mas critico y tin mas competencia, y hopi reglamento cu bo mester cumpli cune. Tin rekisitonan legal cu hopi biaha un persona cu a caba di cuminza un negoshi, ta hopi bon den su area, pero p’e tin conocemento total di nos leynan; obligacionnan fiscal y administrativo, DIMAS, y tur e vergunningnan cu mester cumpli cu nan por ta hopi complica y stroba un comerciante cu a caba di cuminza cu su empresa. Pues, ta hopi importante pa tin guia y asistencia.
E idea di IDEA pa bin cu un website integra unda tin link cu tur otro departamento y ta pone informacion available na un forma hopi accesible, ta hopi importante. Mi ta kere cu esaki ta hustamente loke nos empresarionan mester. Esaki ta e ambiente di inversion cu nos tin cu crea, pa ora un hende kier cuminza un negoshi e tin un idea cu nos ta yude; cu gobierno di Aruba tey como su partner y esaki ta un prueba di esey.
Cu gobierno tey pa yuda comercio y cada biaha bo ta mira cu gobierno ta mas profesional den esey y e ayudo ta bira mas direct. Mi ta kere cu esaki ta algo hopi bon y necesario tambe. Dus, masha danki pa e iniciativa y mi ta sigur cu di parti di gobierno lo sigui duna apoyo na e tipo di iniciativanan aki. Mi ta kere cu den tempo e tipo di cooperacion aki mester bira mas profundo pasobra esaki ta e prome paso, pero tin comerciante cu continuamente mester di asistencia”, e mandatario a señala.
El a agrega cu ora di cumpli cu e leynan fiscal e background ta complica. Por ta e persona ta bon de su materia, pero pa e tin conocimento legal y di belasting e ta full un otro cos, y pa tin conseheronan bon pa yude, e ta costa placa. El a reitera cu si gobierno por duna su ayudo den e parti aki e ta kita un peso for di e comerciante chikito y esun cu ta cuminza y ta dune espacio pa e dedica na su propio negoshi den cual e ta bon.
“Esaki ta e partnership cu nos ta busca entre gobierno cu comercio y mi ta spera cu uza e website tambe ta motiva pa informa otro personanan di e website y haci bon uso di dje. Mi ta kere cu feedback tambe ta hopi importante, pa sa con nan ta experiencia e website y e servicio aki, pa continuamente keda mehora y percura cu e ta cuadra cu e peticion y deseo di comercio”, segun e mandatario, ken a desea tanto IDEA como e usuarionan di e website hopi exito y cu por sigui lanza e tipo di ideanan aki.
