Militarnan di Aruba y Curaçao a sobresali den famoso Texas Trail Roundup

ORANJESTAD (AAN): Manera ta conoci, e asina yama “Texas Trail Roundup” ta un evento internacional di 3-dia di caminata,

cu ta wordo organiza pa ‘America’s Walking Club’ na San Antonio, Texas.  E ta wordo organiza anualmente na final di e winter frieu di Texas.

   Y e biaha aki un grupo di militar di Caribe, e.o. Aruba y Curaçao, a bay participa den e caminata pisa aki.

   Esnan di Caribe a logra crea un record tambe na e Texas Trail Roundup aki na San Antonio.  Den tres dia nan a cubri tres distancia, esta di 10 kilometer, 42 kilometer, y 21 kilometer.

  Mescos cu e famoso ‘Vierdaagse di Nijmegen’ na Hulanda, tabatin cada dia un ruta diferente riba programa. 

   E enfoke aki tabata dirigi riba teamwork, forza, y perseverancia, y e militarnan di Caribe a demostra cu nan tin tur esey completamente bao control.  Nan tabata cana tur caminda cu nan bandera di Aruba, bandera di Curaçao, y tambe bandera di Merca riba nan rugtas.

   Nan esfuerzo a wordo recompensa cu e ‘Golden Booth Award’, cu ta un trofeo honorario pa e unidad militar cu a duna mihor prestacion.  E reconocimento cu lo keda cu e nomber ‘CARMIL’ poni riba dje pa e siguiente 12 añanan.  Riba combinacion di potret por mira mas di e grupo canando rond na Texas cu nan bandera.