GUANARE: Den e canal di awa conoci como ‘El Venado’ na e parti zuid di municipio Guanarito na estado Portuguesa na Venezuela,
a bin topa cu un cantidad inusual di pisca morto, principalmente di e especie coporo (conoci como ‘Bocachico’), cu ta un pisca cu ta biba den awa dushi.
E piscadornan di e area a calcula, cu como 5.500 te cu 6.000 kilo di pisca a muri, y tur esaki ta concentra den un zona specifico di semi-birada di e canal.
Awor ta supone cu morto di e piscanan aki a wordo ocasiona di un venenamento ‘pa casualidad’, sin e hipotesis di laga afo un posible intervencion di algo cu hende a haci. Ta tene cuenta tambe cu e area ey ta uno caminda cu pa por pisca, ta haci uso di un mata conoci como ‘barbasco’, cu ta un especie di knol cu ta pone piscanan haya soño y hasta causa nan morto.
Autoridadnan na Guanarito a pidi yudanza di expertonan di Gobierno na Caracas pa manda oficialnan bin yuda investiga, y haya sa e causa exacto di e situacion aki, y preveni cu e lo por ripiti atrobe.
E canal unda a haya hopi pisca, ta uno cu ta yena cu awa solamente den temporada di awacero, y e ta conecta cu e rieu La Portuguesa tambe, y te aki e investigacionnan lo tin di bay coba pa haya sa kico a socede.
