Mike Eman a mara Aruba na gastonan impagabel di personal

Esfuerso grandi di Gobierno Wever-Croes pa baha reduccion salarial --- *12 di Mei 2014 Gobierno Mike Eman a firma acuerdo cu sindicato  ---  *11 di Juli 2014 Decreto di Reino pa supervision financiero Aruba

ORANJESTAD(AAN)—Na e momentonan aki Aruba ta confronta un problema sumamente grandi debi na e exigencianan sindical pa Gobierno deshaci di entrega di un parti di salario dor di personal di Gobierno.

DIARIO durante ultimo dianan a bay mas na rais di tur e problemanan cu a manifesta nan mes.

Resultadonan di DIARIO a wordo atende cu expertonan financiero cu a bolbe na raiz di hopi problema cu ta e acuerdonan cu a wordo alcansa den pasado cu sindicato mientras ya tabata un hecho cu Aruba tabata confronta un situacion financiero sumamente pisa.

Hunto cu expertonan DIARIO a busca y analisa documentonan cu ta mustra cu pa haya un bista real di loke ta pasa awe, mester bay na 2014 ora un situacion inaceptabel pa empresanan priva, a presenta den Gobierno.

Tabata na 2014 cu Gobierno di Mike Eman a negocia un areglo pa ahusta salario di trahadornan di gobierno na costo di bida.

Dia 12 di mei 2014, Gobierno Mike Eman a yega na un acuerdo cu sindicatonan di Gobierno.

Di acuerdo cu Leynan pa gasta placa di Aruba, e Ley di Contabilidad, un Gobierno no por mara un pais na gastonan, cu e pais lo no por paga.

Ley di Contabilidad ta exigi pa e gobernante mara e pais na gastonan realistico, loke sigur no ta bini dilanti den e areglo alcansa entre Gobierno Mike Eman y sindicatonan cu ta papia di cantidad di “premie” cu ta comparabel cu bonusnan cu e personal di Gobierno lo mester a ricibi.

E “Bashi Premie” ta pa inicio di un aña, pero tin premie y sumanan cu DIARIO lo sigui splica den proximo edicionan cu ta crea un gasto importante pa Gobierno.

Importante den e caso aki tabata, cu Gobierno Mike Eman a yega na un acuerdo pa paga tur e beneficionan aki, sabiendo cu e situacion financiero di Aruba tabata sumamente malo.

Expertonan cu DIARIO a consulta ta papia di kiebra di ley di bon gobernacion dor di Gobierno Mike Eman cu Mei 2014 a mara e pais na pagonan enorme na diferente momento di aña, mientras Aruba tabata den un situacion financiero desastroso, cu lo a exigi medida serio contra comunidad y hasta e trahadornan di Gobierno cu finalmente mester paga mas belasting mescos cu henter comunidad pa cubri e gastonan extra cu Mike Eman a crea na 2014.

E parti mas serio ta, cu 11 di Juli 2014, oficialmente Aruba a cuminsa cay bou supervision di Reino Hulandes, ora Hulanda a yega.

Pues Mike Eman a mara Aruba na gastonan di personal na momento cu e tabata sa cu Aruba no por paga mas den futuro debi na e medidanan cu Gobierno lo mester a tuma pa por a scapa Aruba di e situacion di bancarota cu Gobierno Mike Eman a crea.

Expertonan hunto cu DIARIO a repasa gastonan di Gobierno Wever-Croes cu no ta basa solamente riba e gastonan cu e pandemia a trece cune.

E gastonan di Covid-19 cu a exigi Gobierno tuma medida extra, a aumenta e peso cu ya Aruba tabata tin a base di acuerdonan cu Gobierno Mike Eman a alcansa cu sindicatonan na momento cu na 2014 Gobierno Mike Eman a wordo pone bou supervision.
Prueba cu DIARIO tin ta indica cu e actual Ministro di Asuntonan Financiero Xiomara Maduro, a logra fondonan pa baha e recorte di salario di personal te na mitar den situacionnan sumamente serio.

Un pregunta serio cu expertonan a lansa ta, pakico sindicalistanan cu tabata na haltura di e situacion di Aruba na 2014 a permiti e acuerdo cu Gobierno Mike Eman, cu nan tabata sabi cu lo a bira dificil den futuro hasta si pandemia no a bati na porta.

Segun informacion di expertonan, e sindicatonan tabata tin deber di studia cifranan real di Aruba prome cu nan a mara tambe e trahadornan di Gobierno cu tambe mester paga belasting, na e acuerdo cu Gobierno Mike Eman na 2014.

Un situacion sumamente serio ta surgi na Aruba, cu mester baha gastonan riba tur tereno pa sobrevivi e crisis financiero cu concientemente Gobierno Mike Eman a crea y e gastonan di Pandemia cu ta afecta e pais.

DIARIO ta continua cu su investigacionnan y lo informa Aruba cu luho di detaye.