E no kier bira Ministro tanten cu AVP ya ta casi pro-HOFA
ORANJESTAD (AAN): Siman a habri cu e informe cu Dialuna mainta, Parlamentario Mike de Meza di AVP, awor cu e lo no wordo persigui mas door di Ministerio Publico pa asunto di impuesto.... a divulga un informacion hopi fuerte mes cerca Prome Ministro Mike Eman.
Manera ta conoci, desde eleccion ultimo unda cu De Meza a ricibi hopi voto, diripiente a bin e sorpresa cu e no por pasa screening relaciona cu e aspecto di impuesto, cu di comienzo e Parlamentario a desmenti.
Y awor ultimo dianan a tende cu De Meza ta sigui para fuertemente riba su rechazo pa acepta e Ley di Reino HOFA riba cabez di pueblo di Aruba. Toch ta sigui pensa cu e lo por acepta un puesto awor como Ministro.
Pero Dialuna mainta, Mike de Meza a indica cu oficialmente e ta retira su disponibilidad pa wordo nombra como Ministro den e actual gobierno aki. Y den su carta na Premier Eman, e ta referi principalmente riba e plan pa acepta Ley di Reino di HOFA, cu ta pa finansa publico sostenibel di Aruba.
Na opinion di De Meza, e ley di HOFA ta bay mishi direct cu autonomia financiero y presupuestario di Aruba y ta limita responsabilidad di institucion manera Parlamento di Aruba. Pa tal motibo e ta opina cu ta Aruba henter mester duna e ultimo palabra prome cu Gobernantenan tuma esaki over.
De Meza a recorda Mike Eman con AVP a core campaña cu nan lo ta contra un Ley di Reino asina cu ta negativo pa autonomia di e isla aki. E ta corda riba e historia di Aruba, cu a lucha pa e isla tin un status aparte den Reino Hulandes.
Mike de Meza asina a bisa e lider di AVP, cu e ta retira su disponibilidad pa un nombramento pa titulo di Ministro den gobierno AVP-Futuro, y cu e no kier wordo presenta mas pa ningun otro funcion Ministerial den e gobierno actual.
