Dennerich Kelly:
ORANJESTAD (AAN): E hoben politico di AVP, Dennerich Kelly tabata na Den Haag den Hoge Raad ora e sentencia a cay pa forsa Aruba habri matrimonio entre pareha di mesun sexo.
Segun Kelly ta momento pa nos bolbe sinta reflexiona kico esaki kiermen pa nos comunidad. “E lucha di un grupo den comunidad cu ta sinti nan mes discrimina y banda di esaki despues cu pueblo por a wak cu den parlamento, e politiconan no a logra yega na un decision pa regla cierto aspectonan cu e grupo aki tabata bogando p’e” asina Dennerich Kelly a expresa su desapunto rib’e tema aki.
Kelly ta di opinion cu e situacion no mester a yega asina leu y cu mester a busca un forma mas madura y menos hostil pa regla e derechonan cu tabata falta den nos mes cas, esta parlamento asina respetando Fe y creencia religioso di un gran mayoria di nos isla. “Nos ta boga pa ta baas den nos mes cas y pa falta di madurez politico, awe nos ta haya cu Hoge Raad, kende no ta escogi pa representa nos pueblo, awo ta dicidi pa nos.” e hoben politico a subraya catalogando e arrest di Hoge Raad como un “gemiste kans”
"E ta haya cu a yega ora pa Reino Hulandes combati tur desigualdad cu ta existi den Reino, awor t’e momento pa un era di hoben politico boga pa elimina desigualdad den enseñansa, cuido medico y caba cu pobreza riba nos islanan. Na final tur ciudadno den Reino Hulandes merece mesun calidad di bida sin importa unda nan ta biba den reino. “Tin un linea hopi fini pa encamina ora ta trato caso pa cu topico controversial asina aki y berdad bo por sinti cu bo ta discrimina, y esaki ta di compronde. Pero e ta keda unabes mas n’e representantenan di pueblo pa yega na otro y bin cu un solucion den cas” Kelly cu ta futuro candidato riba lista di AVP a vocifera dilanti Hoge Raad na Den Haag.
Segun Dennerich Kelly e matrimonio entre homber y muher ta un principio pa un comunidad nace y sobrevivi cual ta institui ya desde comienso di mundo crea door di Dios. For di un matrimonio ta nace un famia cual t’e fundeshi di bida y educacion pa un comunidad duradero. No ta descarta cu persona nan den e comunidad, tur lo ta mescos y cu tur lo tin e mesun preferencia sexual. Na e momento ey bo ta haya un kiebro di comportacion humano cu lo mester contribui na mantene e comunidad y tambe humanidad su existencia. E kiebro aki no mester uz’e pa bringa otro pero hustamente por uz’e aspecto pa respeta y trata otro na bon forma pa yuda otro. Esey lo bin di amor, un amor fundamental cu nos cada un tin den nos inculca door di nos mayonan y basa rib’e mandamento di Dios: Stima bo prohimo manera bo mes.
Dennerich Kelly ta un hoben politico cu pronto lo subi lista di Partido di Pueblo Arubano (AVP). E ta un professional den cuido medico, gradua na Hulanda den enfermeria. Cu algo mas di un decada den experiencia a labora na entre otro dr. Horacio Oduber Hospital, ImSan y actualmente como Praktijkondersteuner Huisartsenzorg (POH), Dennerich a sinti e yamada pa trece un cambio den politica na Aruba. E ta sinti cu nos generacion ta biba den un era transcendental unda no por djis para wak pero tin cu actua awo pa sigura un miho futuro y provenir p’e generacionnan siguiente.
