Minister Dangui Oduber sumamente satisfecho: --- Mesun tendencia ta mustra pa luna di Juli
ORANJESTAD (AAN) – “Encuanto e mercado principal, esta Merca, cu ta trece mas turista, kiermen, mas placa pa nos pais su economia, nos a mira un recuperacion sumamente bon y positivo”. Minister di Salud y Turismo a declara den conferencia di prensa di Dialuna.
El a agrega: “Bo ta wak e mesun tendencia, cu e cantidad di bishitantenan den su totalidad. E mercado Mericano tambe den luna di Januari a cuminza relativamente slow, nos no a recupera manera nos tabata desea, pero si mira e grafico Januari a habri cu recuperacion di 70%, Februari 92%, Februari 92%, Maart 94% y por mira cu e ta subi gradualmente, pero e ultimo tres lunanan cu ta April, Mei y Juni, tin un recuperacion, den comparacion di 2019, di 114, 107 y 106%, y tambe den luna di Juli nos ta bay mira un recuperacion di riba 100% pa e mercado Mericano cu ta esun principal y di mas importante pa nos turismo”, e mandatario a indica.
Mercado di Hulanda a sobrepasa cifranan di 2019:
Minister Dangui Oduber a señala cu ministerio di turismo a enfoca tambe riba recuperacion di e mercado di turismo Hulandes, y esaki a registra un recuperacion sumamente bon. “Si nos compara esaki mes cu aña 2019, di luna di Januari caba, por mira cu nan a pone mas asiento pa Aruba. E ultimo lunanan aki tin mas capacidad di asiento, y nos ta mira cu for di Januari caba e recuperacion di e mercado di Hulanda, casi a yega 100%, pero despues di Februari te cu Juni 2022. Na Februari a surpasa e cifranan di 2019 unda nos ta mira 117%, na Maart 119%, na April 119%, na Mei 109%, y na Juni tambe 109%. Y mescos cu e mercado Mericano, nos ta expect cu pa Juli, e mercado di Hulanda, tambe lo surpasa e nivel di 2019” Minister Dangui Oduber a señala.
Oduber a expresa cu si mira bon e recuperacion di Aruba, compara cu tur e otro continentenan den mundo, nos por bisa cu e performance di Aruba ta uno excepcional, mirando con nos pais a recupera.
“Esaki ta mustra cu Aruba tabata tin un vision, un strategia y e maneho cu a wordo hiba pa recupera nos turismo y na mesun momento diversifik’e, a duna resultado.
Recientemente, tabata tin anuncio di varios aerolinea di vuelonan nobo, di diferente region. Por ehemplo aerolinea Wingo a anuncia vuelonan directo for di Colombia. Sarpa tambe a anuncia vuelonan nobo. Air Canada tambe a anuncia mas vuelo pa Aruba, y esaki ta conforme nos strategia y vision. “Y si nos mira e recuperacion di e continentenan en comparacion cu Aruba, nos ta mira cu e Continente Americano a recupera 60% den e prome seis lunanan, e Continente Europeo a recupera 36%, e Continente Africano a recupera 50% di su turismo, e Continente di Meddle East a recupera 54% y Asia, Pacifico a recupera 10%, mientras cu Aruba den e prome lunanan di e aña aki a recupera 92% “ Minister Dangui Oduber a indica.
El a conclui bisando cu si no tabata pa e Luna di Januari cu Aruba a worde afecta pa e variante di Omicron, ya caba e pais lo tabata riba e nivelnan di 2019 cu tabata e miho aña di nos historia di turismo.
