MEP y AVP a yega na acuerdo mutuo pa no tene Parada mas riba Diadomingo

Acuerdo logra cu Polis -  ORANJESTAD (AAN): Un conflicto cu tabata stobando den weya, a wordo soluciona Diaranson atardi, entre e dos partidonan grandi di Aruba, hunto cu Mando Policial.

   Esaki ta e hecho cu pa Diadomingo 20 di Juni 2021 tabata parce cu tin 2 Parada di Partido Politico programa pa tuma lugar.   Tanto MEP y tambe AVP tabata indica cu nan tin parada riba e dia ey.  Pero Cuerpo Policial no tin e manpower pa controla dos parada na mesun momento riba e isla.

   Pesey a tene un consulta cu e dos partidonan aki.  Pa Partido AVP a mira cu a participa Robert Candelaria, y pa Partido MEP a participa Hendrik Tevreden como tambe Manolo Giel.

   E dos partidonan a compronde e implicacion di tur esaki riba Cuerpo Policial, y na un forma di demostra madurez, ambos a bay di acuerdo pa simplemente no tene ningun parada mes.

   AVP a bisa cu nan lo bay tin un actividad grandi riba Boulevard dilanti AMC Unicon Megastore.  MEP a bisa cu nan lo bay ta pasando cas pa cas riba Diadomingo y cu sticker acties na lugarnan unda tin espacio pa autonan staciona na banda.

   VOCERO POLICIAL: Segun vocero Lito Lacle, na e consulta aki nan a profundiza nan mes riba e sentencia di Corte di 14 September 2017 unda tabatin diferente punto cu no ta facil pa tuma un decision.   Como cu tanto AVP y MEP kier parada, den e Consulta a evalua e regla di ‘first come, first served’ cu ta poni riba alinea 5 di e sentencia.  (MEP ta esun cu a pidi permiso prome).  Tambe tabatin sugerencia pa trek lot pa dicidi cua partido ta haya e parada, aunke ta poni acerca cu tin di haci un criteria obhetivo cu ta yuda escoge e mihor partido pa core parada.

   Pero riba Diaranson, tur dos partido a yega na un consensus.

   Roberto Candelaria di AVP, a yega un palabracion cu MEP cu lo no sigui cu e peticion pa Parada di Diadomingo.  El a gradici Cuerpo Policial, pasobra a mira den e periodo di campaña nan tabatin un comision activo cu tabata traha transparente, y conhuntamente a yega na e palabracion aki.

   “Aworaki nos ta kere cu ta importante, mirando e situacion cu nos ta den dje, cu e ta den conveniencia pa no tin un actividad di Parada di ningun dos partido.  E ta un conviniencia di pueblo na prome lugar, y nos ta contento cu hunto por a yega na e palabracion aki cu nos ta pensa ta un muestra di madurez, un muestra di por sinta cu otro y delibera y yega na algo cu ta na conveniencia di un y tur,” Candelaria a indica.

   Na Aruba semper tabatin e costumber cu e ultimo Diadomingo prome cu eleccion tin Parada.  Pero den pasado, na 2009 mes, no tabatin Parada.

   NIFICACION DI ‘PARADA’:  Hopi auto coriendo tras di otro dilanti bo cas, nan ta un parada?  Segun vocero Lito Lacle, segun un acuerdo cu nan a yega cu tur 12 Partido Politico pa Eleccion 2021, e palabra “Parada di Auto” pa e biaha aki nifica un parada di mas di 10 auto tras di otro.

   Pues si acaso bo mira un candidato di politico ta coriendo, y tras di dje tin 9 auto di simpatizante ta acompañe pa hibe su cas of unda cu ta, esey oficialmente den bista di Polis na Aruba “NO” ta un Parada.

   Pero pa Diadomingo awor lo no tin parada, y tur partido tin chens di organiza nan actividad di campaña na forma mas tranki.

   Hendrik Tevreden di MEP a bisa cu e acuerdo logra aki ta uno caminda Aruba a sali gana.  El a splica cu su partido lo usa e Diadomingo ey pa keda campaña di cas pa cas y tene accion di sticker na lugranan unda autonan tin chens di para na banda.  El a pidi pa tur sostenedor di MEP pa respeta e acuerdo aki.

   “Ban respete pa Aruba sigui gana,” Tevreden a indica na final di e firmamento.  “Nos ta den eleccion no pa mustra forza di un parada, pero mas bien pa convence esnan na cas, esnan cu ta den duda ainda, y esnan den pueblo compronde pakico MEP merece di ta den continuacion di gobernacion.”

   El a bisa cu nan lo ta cas pa cas pa convence pueblo pa bay na victoria dia 25 di Juni 2021.  El a bisa si cu nan lo bay tene e Parada di Victoria riba Diadomingo 27 di Juni 2021.

   Roberto Candelaria a bisa cu AVP na su turno lo organiza un actividad na AMC Unicon Megastore na Boulevard relaciona cu Dia di Tata, y cu nan tambe lo tene nan Parada di Victoria riba Diadomingo 27 di Juni 2021.