Masha Pabien na Jo Henriquez cu otro logro como Executive Producer

ORANJESTAD (AAN):  Parlamentario Xiomara Maduro ta felicita sr. Jo Henriquez kende un biaha mas ta haci Aruba orguyoso na nivel internacional.

E biaha aki Jo a ricibi e prestigioso Sports Emmy Award 2024-2025 pa su trabou como Executive Producer di e impactante documentario titula: “Mountain Queen: The Summits of Lhakpa Sherpa”, actualmente disponible riba Netflix.

E documentario ta conta e bida di Lhakpa Sherpa, un hende muhe balente di Nepal cu a conkista e cumbre mas halto di mundo, Mount Everest, pa mas di dies biaha. Un historia di persistensia, curashi, y determinacion, cu Jo Henriquez y su ekipo ta logra transmiti cu gran sensibilidad y excelencia creativo.

E premio ta refleho di e esfuerso, pasion y talento cu Jo a pone den su trabou. E ta un ehempel di loke por logra ora bo sigui bo pasion y bo meta, sin lubida di unda bo ta bin. Pa Aruba, e logro aki no ta solamente un reconocemento pa un individuo, pero e ta un motibo di orguyo pa tur nos pueblo.

“Nos ta manda un pabien grandi tambe na Famia Henriquez, cu sin duda ta stima y sostene Jo den su trayectoria. Mira un Arubiano truinfa riba e plano internacional, semper ta fuente di inspiracion pa nos hendenan na cas. Masha pabien y masha danki pa laga Aruba briya un biaha mas den exterior,” ta palabranan expresa pa Parlamentario Xiomara Maduro.