KIA den colaboracion cu Fundacion pa nos Muchanan y Tienda di Educacion:
ORANJESTAD (AAN): Recientemente, den cuadro di Dia Internacional di Mucha, Activiteiten begeleiders di Korrectie Instituut Aruba (KIA) den colaboracion cu Fundacion Pa Nos Muchanan (FPNM) y Stichting Tienda di Educacion (TdE), a organisa un actividad special pa mamanan deteni y nan yiu(nan). E meta principal di e actividad tabata pa fortalece e laso emocional entre e mama y su yiu(nan) y crea recuerdonan cu por uni nan, apesar di e distancia fisico cu detencion ta trece cu ne.
E actividad ta alinea cu e principio cu cada mucha tin derecho pa ricibi amor, cuido y atencion di su mayornan.
Detencion di un mayor ta trece un reto unico pa e relacion entre e mayor y su yiu. Muchanan cu un mayor deteni ta wordo enfrenta regularmente cu sentimentonan complica di perdida, inseguridad y tin biaha ta culpa nan mes pa e detencion di e mayor, sinembargo, mayornan tambe ta preocupa pa e impacto emocional y psicologico cu nan ausencia tin riba nan yiu(nan). Fortalecimento e relacion entre mayor y yiu por contribui na e capacidad di resistencia y bienestar di e mucha y duna e mayor un oportunidad pa tin un rol valioso den bida di su yiu, apesar di e circumstancianan.
Segun e Tratado Internacional di Derechonan di Mucha, cada mucha tin derecho na contacto cu nan famia y na amor cual ta un aspecto esencial pa nan desaroyo y bienestar general. E actividad aki ta diseña specificamente pa sostene esaki pa duna mayornan deteni cu nan yiu e oportunidad pa fortalese e laso emocional entre nan.
E programa a consisti di un serie di actividad interactivo y creativo, cu enfoke riba comunicacion, recreacion y creacion di recuerdonan cu ta keda. E muchanan y nan mama tabata contento cu e oportunidad pa pasa un mainta completo huntu. FPNM, TdE y KIA ta satisfecho cu e resultado di e mainta.
Como continuacion, durante 2025, FPNM hunto cu TdE lo lansa e programa “Entre mayor y yiu: Un comienso nobo.” E programa aki ta consisti di un serie di workshops cu ta cubri diferente temanan importante. Esaki ta specificamente dirigi na mamanan y tatanan cu ta encarcela y tin yiu entre 0 pa 18 aña. E meta principal di e programa ta pa duna e mamanan y tatanan e conocemento y hermentnan necesario pa yuda nan prepara pa un transicion di KIA pa cas, caminda nan por ta cerca nan yiu.
Pa sosten den lantamento di bo yiu, por tuma contacto libremente cu FPNM via WhatsApp: 699-8900 of TdE na 161 Gratis.
