Lo dura 3 pa 4 dia pa DOW y DIP verkavel ruta di Carnaval

Señor Daryl Lue di DOW:

ORANJESTAD (AAN): Manera ya conoci, diabierna a tuma luga sacamento di nombernan cu a bin na remarca pa haya un kavel pa Carnaval e aña aki. Dialuna mainta ploegnan di DOW y DIP, a cuminsa marca e luganan di kavel riba e ruta di Carnaval cuminsando for di Cas di Cultura te na Vondelaan. Y despues lo sigui marca e ruta di LG.Smith Boulevard bay abou. Señor Daryl Lue di DOW, den un entrevista cu DIARIO, a indica cu esaki lo tin un duracion di 3 pa 4 dia pa termina e trabao aki.

   Presente tambe na e ocacion, tabata Bureau City Inspector. Ya na cuminsamento a tuma nota cu hende a cuminsa marca varios tereno uzando entre otro, cadena, banki y tape. E maneho di DIP ta indica cu no por pone obstaculo riba caminda publico cu por forma peliger pa usuarionan na pia. Mientras, esakinan a wordo kita pasobra ainda no tin permiso pa marca niun spot y DOW, DIP y BCI lo keda controla den e temporada nos dilanti.

   Señor Lue ta pidi pa no marca riba caminda sigur no for di Linear Park bay abou cu ta reserva pa verkaveling. Cada kavel lo wordo indica cu su number corespondiente pa asina e ganadornan di kavel por sa exactamente unda nan por pone nan tent y ta un indicacion tambe pa pueblo unda nan no por marca.

   Señor Lue a agrega cu DOW ta poniendo hekinan tambe pa marca te unda por haci uzo di e tereno y pa no bay mucho patras.